අවශ්‍ය සංශෝධන ඇතුළත් නොකොට සම්මත වූවායැයි කියන අතුරුදන් වූවන් පිළිබඳ කාර්යාලයක් පිහිටුවීමේ පනත පිළිගත නොහැකි බව ජාතික හෙළ උරුමය පවසයි.
ඊයේ (24) බත්තරමුල්ල පන්නිපිටිය පාරේ පිහිටි ජාතික හෙළ උරුමය ප්‍රධාන කාර්යාලයේ පැවැති මාධ්‍ය දැනුවත් කිරීමේ හමුවකට එක්වෙමින් ජාතික හෙළ උරුමයේ මාධ්‍ය ලේකම් නිශාන්ත ශ්‍රී වර්ණසිංහ මහතා එසේ පැවසීය.පෙරේදා (23) අතුරුදන්වූවන් පිළිබඳ කාර්යාලයක් පිහිටුවීමේ සම්මත වූ පනත් කෙටුම්පතට කථානායකවරයා අත්සන් තැබුවද ඊට එක් කළ සංශෝධන නියමිත ලෙස එක්වී නැතැයි පාර්ලිමේන්තුවේ දැඩි විවේචන එල්ල වූ බවද සඳහන් කළේය.
ජනාධිපති මෛත්‍රීපාල සිරිසේන මහතා මෙන්ම ජනතා විමුක්ති පෙරමුණ ද ඊට සංශෝධන ගෙනා බවත් වර්ණසිංහ මහතා පැවසීය.
නියමිත සංශෝධන රහිතව සම්මත වී ඇති පනත ඒ අයුරින් පිළිගැනීමට ජාතික හෙළ උරුමය සූදානම් නැති බවත් අදාළ සංශෝධන ඊට එක්විය යුතු බවත් ඔහු අවධාරණය කළේය.