යුද සමයේ සැඟවූ වූ සහ අත්හැර දමා ගිය පුපුරන ද්‍රව්‍ය සහ යුද උපකරණ යුද්ධය පැවති ප්‍රදේශවලින් හමු වීම සාමාන්‍ය තත්වයක් බව කියා සිටින ආරක්ෂක අමාත්‍යංශය, එමගින් ජාතික ආරක්ෂාවට තර්ජනයක් නොමැති බව පවසයි.
ආරක්ෂක ලේකම් කරුණාසේන හෙට්ටිආරච්චි මහතා ඒ බව සඳහන් කළේ යාපනය චාවකච්චේරි ප්‍රදේශයේ නිවසක තිබී මරාගෙන මැරෙන ඇදුම් කට්ටලයක් ඇතුළු පුපුරන ද්‍රව්‍ය තොගයක් සොයා ගැනීම සම්බන්ධයෙන් අදහස් දක්වමිනි.
‘යුධ සමයේ තැන්වල දමා ගිය ඒවා පසුගිය කාලයෙත් හමු වුනා. දැනුත් හමු වෙනවා.’
බුද්ධි අංශ හා ආරක්ෂක හමුදා ඒ පිළිබඳ නිරන්තර අවධානයෙන් පසු වන බව ආරක්ෂක ලේකම්වරයා කියා සිටියේය.
බදාදා උදෑසන චාවකච්චේරි පොලිසියට ලැබුණු තොරතුරක් මත සිදු කළ පරීක්ෂාවක දී ප්‍රදේශයේ නිවසක් තුළ තිබී මරාගෙන මැරෙන ඇදුම් කට්ට්ලයක්, පැති බෝම්බ 04ක්, කිලෝග්‍රෑම් 12ක බරින් යුතු ටීඑන්ටී පුපුරන ද්‍රව්‍ය අඩංගු පාර්සල් 03ක්, මිලිමිටර් 09 වර්ගයේ පතොරොම් 100ක් හමුව තිබේ.
එම ආයුධ තොගය ළගතබාගත් පුද්ගලයා මේ වන විට අත්අඩංගුවට ගෙන ඇති අතර ඔහු පුනුරුත්තාපනය නොවූ කොටි සාමාජිකයෙකු බව හෙළිව තිබේ.