රජය විසින් වැට් බදු සංශෝධනය කරනු ලැබුවේ ආර්ථිකය ගොඩගැනීමේ තාවකාලික පියවරක් ලෙස බව ධීවර හා ජලජ සම්පත් සංවර්ධන අමාත්‍ය මහින්ද අමරවීර මහතා පවසයි.
ජනතාව මත බදු බර පටවා ඔවුන් පීඩාවට පත් කිරීමේ කිසිදු අදහසක් රජයට නොමැති බව අමාත්‍යවරයා පෙන්වා දෙයි.
මහින්ද අමරවීර අමාත්‍යවරයා මේ බව ප්‍රකාශ කළේ හම්බන්තොට ගංගාතිලක විහාරස්ථානයේ පැවති උත්සවයකට එක්වෙමිනි.
ඕනෑම රජයක් පවත්වාගෙන යාම සඳහා බදු අයකිරීම සාමාන්‍ය තත්ත්වයක් බව පවසන අමාත්‍යවරයා අතීතයේ ද එවැනි බදු අයකිරීම් සිදුකර ඇති බව කියා සිටියේය.
පසුගිය කාලයේ රජය ගත් අධික ණය හේතුවෙන් ජාතික ආදායමට වැඩි මුදලක් ණය පොලී වශයෙන් ගෙවීමට සිදුව ඇති බව ද මහින්ද අමරවීර අමාත්‍යවරයා වැඩිදුරටත් සඳහන් කළේය.