රක්ෂිත බන්ධනාගාරගත කර සිටින පූජ්‍ය ගලගොඩඅත්තේ ඤාණසාර හිමියන් බැහැ දැකීම සදහා බන්ධනාගාරයට පැමිණෙන පුද්ගලයන් සම්බන්ධයෙන් සියළු තොරතුරු ලබා දෙන ලෙස අධිකරණ හා බුද්ධ ශාසන අමාත්‍යාංශය බන්ධනාගාර කොමසාරිස්වරයාට නියෝග කර ඇති බව අධිකරණ අමාත්‍යාංශ අභ්‍යන්තර තොරතුරු මාර්ගවලින් Colombotoday වෙත වාර්තා වනවා.
පසුගිය දින කිහිපයේදී ඤාණසාර හිමියන් බැලීම සදහා බන්ධනාගාරයට සහ බන්ධනාගාර රෝහලට පැමිණ පුද්ලයන් සහ එහිදී සිදුවූ කතා බහ සම්බන්ධයෙන් මුද්‍රා තබන ලද සම්පූර්ණ වාර්තාවක් බන්ධනාගාර කොමසාරිස්වරයා විසින් අධිකරණ අමාත්‍යාංශයට යොමු කර ඇති අතර අධිකරණ අමාත්‍යාංශ විසින් එය විවෘත නොකර අගමැති කාර්යාලය වෙත යවා ඇති බවත් එම ආරංචි මාර්ග තවදුරටත් සදහන් කරනවා.
මෙම සිදුවීම සම්බන්ධයෙන් අධිකරණ අමාත්‍යාංශයේ ජ්‍යෙෂ්ඨ නිලධාරීන් දැඩි අප්‍රසාදය පලකර ඇත. රටේ නීතිය සහ අධිකරණ පද්ධතිය ස්වාධීන වී ඇති බවට යහපාලන නියමුවන් උදම් අනද්දී මේ ආකාරයෙන් දේශපාලන බිලිබෑම් සදහා අගමැති කාර්යාලය විසින්ම අධිකරණ ක්‍රියාවලියට ඇගිලි ගැසීම යහපාලනයදැයි එම නිලධාරීන් දැඩිව ප්‍රශ්නකර ඇති බවද අධිකරණ අමාත්‍යාංශ තොරතුරු මාර්ග තව දුරටත් අනාවරණය කරයි.