මහා මාර්ග දෙපස එකතු වන කසළ නිසි පරිදි ඉවත් නොකිරීම ඩෙංගු රෝගය ව්‍යාප්ත වීමට ද බලපා ඇති නිසා එයට තාවකාලික විසඳුමක්‌ වශයෙන් සති දෙකක කාලයක්‌ සඳහා හදිසි ආපදා තත්ත්වයක් ප්‍රකාශයට පත්කර ත්‍රිවිධ හමුදා හා පොලිස්‌ නිලධාරීන් යොදවා එම කසළ ඉවත් කිරීමේ වැඩපිළිවෙළක්‌ ක්‍රියාත්මක කරන ලෙස සෞඛ්‍ය ඇමැති වෛද්‍ය රාජිත සේනාරත්න මහතා, ජනාධිපති මෛත්‍රිපාල සිරිසේන මහතාගෙන් ඉල්ලීමක්‌ කර තිබේ.
කසළ කළමනාකරණය සඳහා දැඩි නීති රීති ගෙන ආ යුතු බව පෙන්වා දෙන සෞඛ්‍ය ඇමැතිවරයා කොළඹ නගරයේ ඇතැම් ස්‌ථානවල ගොඩගැසී ඇති කසළ ඉවත් කිරීම හා පවිත්‍ර කිරීම ත්‍රිවිධ හමුදාව හා පොලිසිය යොදවා සිදුකළ යුතු බවද කියා සිටියි.
සෞඛ්‍ය අමාත්‍යංශය ක්‍රියාත්මක කරනු ලබන මදුරු මර්දන වැඩසටහන් සඳහා පෞද්ගලික අංශයේ දායකත්වය ලබා ගැනීම පිළිබඳ සාකච්ඡාවකදී ඔහු එබව සඳහන් කළේය.
පසුගිය රජය සමයේ දී හිටපු ආරක්ෂක ලේකම් ගෝඨාභය රාජපක්‌ෂ මහතා ද කසළ කළමනාකරණය හා පවිත්‍ර කිරීමේ කටයුතු සිදුකරන ලද්දේ ත්‍රිවිධ හමුදාව යොදා ගනිමින් බවද ඇමැතිවරයා කීවේය.