හිටපු ජනාධිපති මහින්ද රාජපක්ෂ මහතාගේ පරාජයට තමා වගකිය යුතු බවට ඇතැම් පාර්ශවයන්ගෙන් එල්ල වන චෝදනා නිහතමානීව තමන් පිළිගන්නා බව හිටපු ආර්ථික සංවර්ධන අමාත්‍ය බැසිල් රාජපක්ෂ මහතා පවසයි.
ශ්‍රී ලංකා පොදු ජන පෙරමුණේ මංගල මාධ්‍ය හමුවට එක්වෙමිනුයි හිටපු අමාත්‍යවරයා මේ බව කියා සිටියේ.
තමා පසුගිය ජනාධිපතිවරණයෙන් පසුව රට හැරදා පලා නොගිය බවත් “මහින්ද රාජපක්ෂ දේශපාලනයෙන් සමු ගන්නා බවට මහින්ද රාජපක්ෂ විසින්ම දේශපාලනික වශයෙන් තීන්දුවක් ගෙන තිබුණ හෙයින් තමා රටින් පිටවූ බවත් ඔහු වැඩිදුරටත් කියා සිටියේය. මහින්ද රාජපක්ෂගේ පරාජය තමා නිසා සිදු වූවානම් මේ මොහොතේ තමා එය නිවැරදි කිරීමට සූදානම් බවද හෙතෙම කියා සිටියේය.
ශ්‍රී ලංකා පොදුජන පෙරමුණ වටා ලක්ෂ 78ක ජනතාවක් පෙළගැසී සිටින බැවින් ශ්‍රී ලංකාවේ ප්‍රධාන දේශපාලන පක්ෂ දෙකෙන් එකක් ලෙසට නව පක්ෂය හැඳින්විය හැකි බව බැසිල් රාජපක්ෂ මහතා පැවසීය.
මෙහිදී අදහස් දැක්වූ ශ්‍රී ලංකා පොදුජන පෙරමුණේ සභාපති මහාචාර්ය ජී.එල්.පීරිස් මහතා සඳහන් කළේ පාර්ලිමේන්තු මන්ත්‍රීවරුන් සඳහා පක්ෂයේ සාමාජික කාඩ්පත් 100ක්ද,පළාත් සභා මන්ත්‍රීවරුන් සඳහා පක්ෂයේ සාමාජික කාඩ්පත් 200ක් වෙන්කර තිබෙන බවයි.