ඉදිරි මාස කිහිපයේ ගම්පහ දිස්ත්‍රික්කය තුළ ඩෙංගු රෝග ව්‍යාප්තිය තවදුරටත් ඉහළ යාමේ දැඩි අවදානම් තත්ත්වයක් පවතින බව ගම්පහ දිස්ත්‍රික් ලේකම් කාර්යාලය පවසයි.
ගම්පහ දිස්ත්‍රික්කය තුළ ඉතා විශාල වශයෙන් ඩෙංගු රෝග ව්‍යාප්තිය පිළිබඳ තොරතුරු අනාවරණය වී ඇති බව ගම්පහ දිස්ත්‍රික් ලේකම් කාර්යාලය නිවේදනයක් නිකුත් කරමින් පවසයි.
ඩෙංගු රෝගීන් වැඩිම දිස්ත්‍රික්කය ලෙස ද ගම්පහ පත්ව තිබේ.
මේ වනවිට ඩෙංගු රෝගීන් 36,911 ක් මෙරටින් වාර්තා වන බව ජාතික ඩෙංගු මර්දන ඒකකය පවසයි.
එහි ප්‍රජා වෛද්‍ය ඉන්දික විරසිංහ මහතා සඳහන් කළේ, මේ මාසය තුළ ඩෙංගු රෝගීන් 7203 ක් වාර්තා වී ඇති බවයි.
සමස්ත රෝගීන්ගෙන් වැඩි සංඛ්‍යාවෙන් බස්නාහිර පළාතෙන් වාර්තා වේ.
ඉන් ගම්පහ දිස්ත්‍රික්කයේ රෝගීන් 22% ක් සහ කොළඹ දිස්ත්‍රික්කයෙන් රෝගීන් 20% ක් ලෙස හඳුනාගෙන ඇත.
සමස්ත රෝගීන්ගෙන් 25% ප්‍රතිශතයක් පාසල් යන වයසේ දරුවන් වන බව ඔහු වැඩිදුරටත් පැවසීය.