මාවනැල්ල, මොල්ලිගොඩ ප්‍රදේශයේ ගල් කොරියක පුපුරන ද්‍රව්‍ය තොගයක් අතුරුදන් වීමේ සිද්ධිය සම්බන්ධයෙන් මේ වන විට පුද්ගලයන් 52 දෙනකුගෙන් ප්‍රකාශ ලබා ගෙන ඇතැයිද දුරකථන අංක හා සීසීටීවී දර්ශන ඔස්සේ ඉදිරි විමර්ශන කටයුතු කර ගෙන යනු ලබන බව ද උසස් පොලිස් නිලධාරියකු ඊයේ (01)දින පැවසීය. එම ගල් කොරියේ පුපුරන ද්‍රව්‍ය අතුරුදන් වීම පිළිබඳ සොයා බැලීම සඳහා මේ වන විට විශ්‍රාමික හමුදා නිලධාරියකු පත් කර ඇත. අපරාධ පරීක්ෂණ දෙපාර්තමේන්තුව, රාජ්‍ය බුද්ධි සේවය, යුද හමුදා බුද්ධි අංශය, කෑගල්ල කොට්ඨාස අපරාධ විමර්ශන අංශය, අපරාධ ස්ථාන පරීක්ෂණ ඒකකය හා මාවනැල්ල පොලිසියේ අපරාධ විමර්ශන අංශය මේ සිද්ධිය පිළිබඳ විවිධ පැතිකඩ ඔස්සේ පුළුල් විමර්ශන පවත්වයි.
මේ ගල් කොරියේ පුපුරන ද්‍රව්‍ය කිසියම් අයකු හෝ කණ්ඩායමක් සොරා ගෙන ගොස් අන්තවාදීන් වෙත දී ඇත්ද යන්න පිළිබඳ ආරක්ෂක අංශවල අවධානය යොමු වී තිබේ. ගල් කොරියේ පුපුරන ද්‍රව්‍ය අතුරුදන් වීමත් සමඟ දින කිහිපයකට පසු මාවනැල්ල හිගුල ප්‍රදේශයේ බුදු මැදුරක ඉදිරි පස ආරක්ෂිත වීදුරුවට ගල් ප්‍රහාරයක් එල්ල කොට ඇති අතර එම සිද්ධියත් සමඟ මාවනැල්ල ප්‍රදේශයට ආරක්ෂක අංශවල විශේෂ අවධානය යොමුවී තිබේ.