වසර පහක සිට නිසි පරිදි වැටුප් නොගෙවීම නිසා ඡායාරූප මාධ්‍යවේදියකු වූ ටී. කුමාර් සිය දිවි නසා ගෙන තිබේ.
ටී. කුමාර් සේවය කර ඇත්තේ යුනයිටඩ් නිවුස් ඔෆ් ඉන්දියා නම් ප්‍රවෘත්ති ඒජන්සියේය. හෙතෙම දෙදරු පියෙකි. පසුගිය 13 වැනිදා හවස ඔහු යුනයිටඩ් නිවුස් ඔෆ් ඉන්ඩියා ප්‍රවෘත්ති ඒජන්සියේ ප්‍රවෘත්ති කාමරය තුළ දිවිනසා ගෙන තිබිණි. තවත් මාධ්‍යවේදීන් චෝදනා කර ඇත්තේ යුනයිටඩ් නිවුස් ඔෆ් ඉන්දියා ආයතනයේ බලධාරීන් සිය සේවකයන්ට නිසියාකාරයෙන් වැටුප් නොගෙවන බවටය. ඇතැම් මාසවල සම්පූර්ණ වැටුප සේවකයන්ට ලබා නොදී කොටස් වශයෙන් එය ලබාදෙන බව ඔවුහු පවසති.
යුනයිටඩ් නිවුස් ඔෆ් ඉන්ඩියා ආයතනයේ සේවය කර ඉන් ඉවත්වූ නම සඳහන් නොකළ මාධ්‍යවේදියෙක්ද මාධ්‍යයට අදහස් දක්වා තිබුණේය. එම ප්‍රවෘත්ති ඒජන්සිය සේවකයන්ට වැටුප් ගෙවීම ප්‍රමාද කරන බව ඔහුද සනාථ කර ඇත. යුනයිටඩ් නිවුස් ඔෆ් ඉන්දියා බලධාරීන් සේවක අර්ථසාධක අරමුදල සඳහා ගෙවීම්ද පැහැර හරින බවට චෝදනා නැඟෙමින් තිබේ.