තමන් වහන්සේ විහාරාධිපති ධූරය දරන සේරුවාවිල මංගල රජමහා විහාරයට නාඳුනන පිරිසක් කඩා වැදී එය බලහත්කාරයෙන් අත්පත් කර ගෙන පාලන බලය ඔවුන් අතට ගෙන ඇතැයි විහාරයේ විහාරාධිපති කොටපොළ අමරකිත්ති හිමියෝ සඳහන් කර ඇති බවට අද (24) මව්බිම පුවත්පත වාර්තා කර ඇති පුවත අසත්‍ය පුවතක් බව අප සිදුකල සොයා බැලීමකදී අනාවරණය විය.
එවැනි ප්‍රකාශයක් කොටපොළ අමරකිත්ති හිමියෝ මව්බිම පුවත්පතට සිදු කර නොමැති බවත් Youtube චැනලයක් සඳහා ලබා දුන් සාකච්ඡාවකදී සිදුවූ පැරණි සිද්ධියක් පිළිබඳව උන්වහන්සේ විස්තර කර ඇති අතර එය අලුත ඇතිවූ සිද්ධියක් ලෙස පටලවාගෙන මෙම වාර්තා කිරීම සිදුකර ඇත. එය උපුටාගෙන තවත් වෙබ් අඩවි බොහොමයක් මෙම වැරදි පුවත වාර්තා කර ඇත.
අමරපුර සංඝ සභාව සහ උත්තරීතර මහා නායක හිමියන් විසින් සේරුවාවිල විහාරාධිපති ධුරයට සඳහා කොටපොළ අමරකිත්ති හිමියන්ව පත්කිරීමෙන් අනතුරුව උන්වහන්සේ සේරුවාවිල භාරකාරත්වය ලබා ගැනීමට තවමත් වැඩම කර නැත. ඒ ශාසන නීතියට සහ මහනායක හිමියන් ඇතුළු සංඝ සභාවට අභියෝග කරමින් කිරිබත්ගොඩ ඥානානන්ද හිමියන්ගේ අසපු වාසින් සේරුවාවිල බලහත්කාරයෙන් රැදී සිටීම හේතුවෙනි.