ශ්‍රී ලංකාවේ නිල සංචාරයක යෙදෙමින් උතුරට ගොස් සිටින එක්සත් ජාතීන්ගේ සංවිධානයේ ඇමරිකා එක්සත් ජනපද නිත්‍ය නියෝජිත සමැන්තා පවර් පවසා ඇත්තේ යාපනයෙන් හමුදා ඉවත් කිරීම ගැන 22 ඉරිදා උතුරේ ආණ්ඩුකාරයා සමග සාකච්ඡා කළ බවයි.
‘යාපනයේ සංවර්ධනය සහ හමුදාහරණය සඳහා තවත් කල් ගත නොහැකි බවට එකඟ වීමු’ යි ආණ්ඩුකාර එච් ජී එම් එස් පලිහක්කාර හමුවීමෙන් අනතුරුව තානාපතිනි පවර් සිය සමාජ මාධ්‍ය ජාලය ඔස්සේ දැනුම් දී තිබේ.
මහ ඇමැති සී වී විග්නේස්වරන් ප්‍රමුඛ අමාත්‍ය මණ්ඩලය උතුරේ දී හමුවූ එක්සත් ජනපද නියෝජිත පිරිස රජයට සහාය දක්වන ලෙස ඔහුගෙන් ඉල්ලා ඇත. එමෙන්ම උතුරෙන් හමුදාව ඉවත් කිරීමේ අවශ්‍යතාවය ගැන විග්නේශ්වරන් විසින් එක්සත් ජනපද නියෝජිතවරිය සමග සාකච්චා කර ඇත. උතුරු පළාතේ අතුරුදන් වූවන් සහ දේශපාලන සිරකරුවන් පිළිබදවද මෙහිදී කරුණු පැහැදිලි කර ඇත.
එක්සත් ජනපද නිත්‍ය නියෝජිත වරිය පවසන්නේ ‘සංහිඳියාව සහ නැවත ගොඩ නැගීම සඳහා ශ්‍රී ලංකාවට උදාවී ඇති අගනා අවස්ථාව තවත් ශක්තිමත් කිරීමට උපකාර වන ලෙස’ මහ ඇමැති වරයාගෙන් ඉල්ලා සිටි බවයි.
