මෙවර අයවැය දැකීමෙන් පසුව ජාත්‍යන්තර මූල්‍ය අරමුදල ඉතාමත් සතුටු වෙමින්, දෙවැනි අදියරේ ණය මුදල ලෙස ඇ.ඩො.මිලියන 162.6ක් අප රටට ලබාදුන් බව මුදල් අමාත්‍ය රවි කරුණානායක මහතා පවසයි.
ජාත්‍යන්තර මූල්‍ය අරමුදල ශ්‍රී ලංකාවට ලබාදීමට යෝජිත ඇ.ඩො. මිලියන 1,500ක පමණ ණය මුදලින්, 2016 වසර සඳහා වූ ඇ.ඩො.මිලියන 325.2 ක ණය මුදලේ දෙවැනි ණය වාරිකය ලෙස ඇ.ඩො.මිලියන 162.6ක් පසුගිය 18 වැනිදා ඇමෙරිකාවේ, වොෂිංටන් නුවර පිහිටි ජාත්‍යන්තර මූල්‍ය අරමුදලේ මූලස්ථානයේ පැවති විධායක අධ්‍යක්ෂ මණ්ඩල රැස්වීමේදී අනුමත කර තිබීම සම්බන්ධයෙන් අදහස් දක්වමින් මුදල් අමාත්‍යවරයා මෙසේ පවසයි.
එහිදී, වැඩිදුරටත් රවි කරුණානායක මහතා පවසන්නේ අයවැයට පසුව මෙම ණය මුදල මුදාහැරීම තුළ රටේ මූල්‍ය විනයක් ඇතිව, යම් ඉදිරි දැක්මක් ඇතිව මෙම රජය කටයුතු කරන බව ජාත්‍යන්තර මූල්‍ය අරමුදල පවා පිළිගෙන ඇති බවද පෙන්වා දෙයි.