ජාතිවාදය ඇවිස්සීම හරහා රටේ ප්‍රශ්න ඇතිකිරීමට ෆේස්බුක් ඇතුළු සමාජ ජාලා තුළ විවිධ පුද්ගලයන් කටයුතු කිරීම හේතුවෙන් ඔවුන් පිළිබඳව කටයුතු කිරීමට විශේෂ පොලිස් ඒකකයක් ඇතිකළ යුතු බව අසාද් සාලි පෙන්වා දෙයි.
ඒ මහතා මේ බව ප්‍රකාශ කළේ ‘බලය බෙදා එක්සත්වීමේ ව්‍යාපාරය’ කොළඹදී සංවිධානය කර තිබූ මාධ්‍ය හමුවක් අමතමිනි.
සිංගප්පූරු රජය, ආගම් භේද ඇතිකළ පුද්ගලයන් අත්අඩංගුවට ගෙන ඔවුන්ට එරෙහිව නීතිය ක්‍රියාත්මක කළ ආකාරයෙන්ම මෙරට රජයද කටයුතු කළයුතු බවයි ඔහු පෙන්වා දෙන්නේ. ඒ අනුව කුමන ජාතියකට හෝ කුමන ආගමකට හෝ එරෙහිව අසත්‍ය ප්‍රකාශ ඉදිරිපත් කරමින් ජාති භේද ආගම් භේද ඇතිකරන පුද්ගලයන්ට එරෙහිව නීතිමය ක්‍රියාමාර්ග ගැනීම අත්‍යවශ්‍ය බව සාලි සඳහන් කරයි.