මින් ඉදිරියට පස් කැපීමේදී හා වනාන්තර හෙළි කිරීමේදී තමාගේ අනුමැතිය ලබාගත යුතු බවට නව නීති ගෙන එන ව ජනාධිපති මෛත්‍රීපාල සිරිසේන මහතා පවසයි.
පොලිතීන් ප්ලාටික් හා ඉලෙක්ට්‍රෝනික අපද්‍රව්‍ය නිවරණ සතිය ප්‍රකාශයට පත් කරමින් ඊයේ (20) පෙරවරුවේ මධ්‍යම පරිසර අධිකාරියේ පැවති උත්සවයකට එක්වෙමින් ජනාධිපතිවරයා මේ බව අවධාරණය කළේය.
පස් කැපීම සහ වනාන්තර හෙළි කිරීම පිළිබඳ දැනට තිබෙන ආයතනික ව්‍යුහය තුළ අදාළ සියලුම ආයතනවල අනුමැතිය හිමි වුවද අවසානයේ පරිසර අමාත්‍යවරයා ලෙස තමාගේද අනුමැතිය අවශ්‍ය බවට චක්‍ර‍ලේඛයක් ඉදිරියේදී නිකුත් කරන බවද ජනාධිපතිවරයා එහිදී සඳහන් කළේය.
දිවයින පුරා අක්‍රමවත් අයුරින් සිදුවන පස් කැපීම්, වනාන්තර හෙළි කිරීම් සහ වැලි ප්‍රවාහනය පිළිබඳ තොරතුරු තමාට ලැබි ඇති බවත් පරිසරයට විනාශයක් සිදු කරමින් කරගෙන ගිය බොහොමයක් කටයුතු තම මැදිහත්වීමෙන් නැවැත්වීමට පියවර ගත් බවත් ජනාධිපතිවරයා සඳහන් කළේය.