කොටුව ලෝටස්‌ පාරේදී යතුරුපැදියකින් පැමිණි පොලිස් බස්‌ රථයක්‌ ඉලක්‌ක කොට බෝම්බ ප්‍රහාරයක්‌ එල්ල කොට පොලිස් නිලධාරීන් දසදෙනකු ඝාතනය කළ එල්. ටී. ටී. ඊ. සාමාජිකයකුට හා එල්.ටී.ටී.ඊ සැකකරුවන් පිරිසකට නවාතැන් ලබාදීමේ චෝදනාව යටතේ පවරා තිබූ නඩුවක විත්තිකරුවකු වන කුලතුංග හෙට්‌ටිආරච්චිගේ මැල්කම් ටිරෝන් විත්තියේ සාක්‍ෂි කැඳවීමකින් තොරවම චෝදනාවලින් නිදොස්‌ කොට නිදහස්‌ කිරීමට කොළඹ මහාධිකරණ විනිසුරු පියසේන රණසිංහ මහතා නියෝග කළේය.
එම නඩුවේ විත්තිකරුවකු ලෙස සිය සේවාදායකයාව නීතිපතිවරයා විසින් නම් කොට ඇත්තේ සැබෑ අපරාධකරුවන්ට නවාතැන් දුන්නේ යෑයි කියන සිද්ධියක්‌ සම්බන්ධයෙන් ඔහුගෙන් ලබාගත් පාපොච්චාරණයක්‌ මත බවත් එම පාපොච්චාරණය ලබාගත් පොලිස් අධිකාරිවරයා මේ වන විට ජීවතුන් අතර නොමැති බැවින් එකී චෝදනාව සාක්‍ෂි ඉදිරිපත් කිරීමේ නීතිමය හැකියාවක්‌ නොමැති බවත් පෙන්වා දෙමින් නීතිඥ සංජය එස්‌. ආරියදාස මහතා දැක්‌වූ මූලික විරෝධතාව පිළිගත් මහාධිකරණ විනිසුරුවරයා එම නියෝගය කළේය.
2008 මැයි 16 වැනිදා හෝ ඊට ආසන්න දිනකදී දැනට මියගොස්‌ සිටින සුන්දරම් සදීස්‌ නමැත්තා සමග එක්‌ව පොලිස් සැරයන් කටුගම්පලගේ දොන් විමලසේන නමැති නිලධාරියා සහ තවත් පොලිස් කොස්‌තාපල්වරුන් හයදෙනකුත් කාන්තා පොලිස් කොස්‌තාපල්වරියන් තිදෙනකුත් ඝාතනය කිරීමට පෙළඹවීමෙන් ත්‍රස්‌තවාදය වැළැක්‌වීමේ පනත යටතේ නැඟෙන දඬුවම් ලැබිය හැකි වැරදි සිදුකර ඇතැයි කේ. එච්. මැල්කම් ටිරෝන් නමැති විත්තිකරුට චෝදනා එල්ල වී තිබිණි.
එම නඩුවේ සෙසු විත්තිකරුවන් සිව්දෙනා මේ වන විට අධිකරණය මගහැර ගොස් සිටින බැවින් ඔවුන් නොමැතිව නඩු විභාගය ලබන 12 වැනිදා ආරම්භ කිරීමට ද විනිසුරුවරයා එහිදී නියෝග කළේය.
-ඒ. ඡේ. ඒ. අබේනායක