පළාත් අතර සංචරණ සීමා යළිත් දැඩි කිරීමට ගත් තීරණයත් සමග අන්තර් පළාත් පොදු ප්‍රවාහන සේවාවල අත්‍යවශ්‍ය රාජකාරී සඳහා පමණක්, ගමන් ගන්නා පුද්ගලයින් පමණක් ප්‍රවාහනයට සැලසුම් කර තිබේ.
දුම්රිය සාමාන්‍යාධිකාරී ධම්මික ජයසුන්දර මහතා සඳහන් කළේ, මේ පිළිබඳව සියලුම දුම්රිය ස්ථාන සහ දුම්රිය ආරක්ෂක අංශ නිලධාරීන් දැනුවත් කර ඇති බවය.
ඒ අනුව, දුම්රියෙන් ගමන් කිරීමට අපේක්ෂා කරන පිට පළාත්වල මගීන් තම සේවා හැඳුනුම්පත දුම්රිය බලධාරීන්ට ඉදිරිපත් කිරීම අත්‍යවශ්‍ය බව ද ඔහු සඳහන් කළේ ය.
පොලීසිය සමග ඒකාබද්ධ ඒ සම්බන්ධ පරීක්ෂා කිරීම් සිදු කෙරෙනු ඇති.
ශ්‍රී ලංකා ගමනාගමන මණ්ඩලයේ නියෝජ්‍ය සාමාන්‍යාධිකාරී ඒ.එච්. පණ්ඩුක ස්වර්ණහංස මහතා සඳහන් කළේ, අන්තර් පළාත් බස්රථවල අත්‍යවශ්‍ය රාජකාරී සඳහා පැමිණෙන මගීන් සඳහා පමණක් පහසුකම් සලසන්නැයි උපදෙස් දී ඇති බවයි.
පළාත් මයිම්වලදී බස් රථ පොලීසිය විසින් පරීක්ෂා කර අත්‍යවශ්‍ය නොවන කටයුතු සඳහා යන පුද්ගලයින් යළි හරවා යැවීමට පියවර ගන්නා බව ද ඔහු සඳහන් කළේ ය.
මේ වනවිට දෛනික දුම්රිය ගමන්වාර 130ක් ක්‍රියාත්මක වන අතර අන්තර් පළාත් බස් ගමන්වාර 1500කට අධික සංඛ්‍යාවක් ක්‍රියාත්මක වේ.