මහනුවරදී පැවති විවාහ මංගල උත්සවයක් සදහා පාසැල් සිසුවියන් 250ක් යොදාගනිමින් එම ළමුන් හිංසනයට ලක්කළ බවට ජාතික ළමාරක්ෂක අධිකාරියට පැමිණිලි වාර්තා වී ඇති බව එම අධිකාරිය සදහන් කරයි.
නිවේදනයක් නිකුත් කරමින් ළමා ආරක්ෂක අධිකාරිය පවසන්නේ සිද්ධිය සම්බන්ධයෙන් විමර්ශනයක් ආරම්භ කළ බවයි. එසේම මේ සම්බන්ධයෙන් අදාළ අධ්‍යාපන බලධාරීන් සමගද සාකච්ඡා කරන බවද එම නිවේදනයේ දැක්වේ.
ගිනස් ලෝක වාර්තාවක් පිහිටු වීම සදහා නිර්මාණය කළ කිලෝමීටර් 3ක දිගින් යුත් සාරි පොටක් ඔසවාගෙන යෑම සදහායි ඊයේ (21) මෙම පාසල් දරුවන් සහභාගී කරගෙන තිබුණේ. එහිදී එම දරුවන් දැඩි ලෙස පීඩාවට පත්ව සිටින අයුරු මාධ්‍ය වාර්තාවල සදහන්ව තිබුණා.
සරත් ඒකනායක විද්‍යාලය ලෙස නම් කර ඇති අලතුගොඩ කණිෂ්ඨ විද්‍යාලයෙන් මෙම දැරියන් පිරිස රැගෙනවිත් තිබෙන අතර, මධ්‍යම පළාත් මහඇමති සරත් ඒකනායකගේ නියෝගයකට අනුවයි ඔවුන් මේ කටයුත්ත සදහා සහභාගී කරගෙන තිබෙන්නේ. එම අවස්ථාවට මහඇමතිවරයාද සහභාගී වී තිබෙන අතර ඔහු දරුවන් හසුරවන අයුරුද වීඩියෝ දර්ශනවල සටහන්ව තිබෙනවා.
පාසැල් දරුවන් මෙවැනි කටයුත්තකට සහභාගී කරගැනීම සම්බන්ධයෙන් මහඇමතිවරයා ඇතුළු පිරිසට දැඩි විරෝධයක් මේවන විට එල්ල වෙමින් තිබෙනවා.
[fbvideo link=”https://www.facebook.com/haraspara/videos/1854084274904151/” width=”580″ height=”400″ onlyvideo=”1″]
