“කූරගල මහා රහතන් වහන්සේලා දොළොස් දාහකට වැඩිය වැඩ හිටපු මහා ඓතිහාසික තැනක්… සලකනවා සමහරු මේක තමයි මේ දිවා ගුහාව කියන්නේ කියලා… මොකද හරිම ලස්සන සානුවක් එතන තියෙන්නේ. දැන් මේක අල්ලා ගත්තා ඒක අල්ලා ගත්තේ සෙයිලානි මුස්ලිම්ස්ලා… දැන් මේක හරිම කෙළියක්නේ යකෝ… දෙවියෙක් ඇත්තෙත් නෑ… ඒ දෙයියගේ මුහුනකුත් නෑ…. ඉතින් අපි අහන්නේ මොන ලබ්බක්ද පෙන්නන්නේ” යනුවෙන් ප්‍රකාශ කිරීමෙන් එකී මුස්ලිම් ප්‍රජාවගේ ආගමික විශ්වාසවලට නින්දා කල බැවින් දණ්ඩ නීති සංග්‍රහයේ 291 ආ වගන්තිය යටතේ දඬුවම් ලැබිය යුතු වරදක් සිදුකල බවට චෝදනා කරමින් බොදු බල සේනා සංවිධානයේ මහ ලේකම් රාජකීය පණ්ඩිත ගලගොඩඅත්තේ ඥානසාර හිමිට අධිචෝදනා පත්‍ර බාරදී තිබෙනවා.
අද (21) කොළඹ මහාධිකරණයේදී මෙම නඩුව කැඳවු අවස්ථාවේදී පූජ්‍ය ගලගොඩඅත්තේ ඥානසාර හිමි අධිකරණයේ පෙනී සිටි අතර උන්වහන්සේ රුපියල් ලක්ෂ 10 ක ශරීර ඇපයක් මත මුදාහරින ලෙස අධිකරණය නියෝග කරන ලද අතර මෙම නඩුව නොවැම්බර් 24 දක්වා කල් තබන ලදි.
2016 වසරේදී මෙම පැමිණිල්ල සංවිධානාත්මක අපරාධ කොට්ඨාශය වෙත ලබා දී ඇත්තේ අසාද් සාලි, මුජුබර් රහුමාන්, රිෂාඩ් බදුර්දීන් යන පුද්ගලයින් විසිනි.
පුජ්‍ය ගලගොඩඅත්තේ ඥානසාර හිමි වෙනුවෙන් නීතිඥ සංජය ආරියදාස මහතා පෙනී සිටින ලදි.