2015 වසරේ මානව හිමිකම් කවුන්සිලය වෙත ඉදිරිපත් කරනු ලැබූ යෝජනාවලිය කිසිලෙසකින් වෙනස් කිරීමට ශ්‍රී ලංකා රජයට ඉඩ ලබා නොදෙන ලෙස ද්‍රවිඩ සංධාන පාර්ලිමේන්තු මන්ත්‍රී එම්.ඒ.සුමන්තිරන් මහතා එක්සත් ජාතීන්ගේ මානව හිමිකම් කවුන්සිල නිලධාරීන් හමුවේ ඉල්ලා ඇත.
පසුගියදා ජිනීවාහී පිහිටි මානව හිමිකම් කවුන්සිල සභාපතිවරයාගේ කාර්යාලයේදී UNHRC නිලධාරීන් හමුවී ඇති සුමන්තිරන් මන්ත්‍රීවරයා ශ්‍රී ලංකා හමුදාවට එරෙහි පරීක්ෂණ සදහා අනිවාර්යෙන්ම විදෙස් විනිසුරුවන් සහභාගී කරවිය යුතු බවත් ඒ සදහා ශ්‍රී ලංකා රජය එකගව ඇති නිසා එය සංශෝධනයට රජයට ඉඩ ලබා නොදෙන ලෙසත් අවධාරණය කර තිබේ.
තවද රජයේ අත් අඩංගුවේ සිටින දේශපාලන සිරකරුවන් නිදහස් කිරීමට රජය කිසිදු වැඩ පිළිවෙලක් මෙතෙක් ගෙන නැතැයි පවසා ඇති මන්ත්‍රීවරයා ත්‍රස්තවාදය වැලැක්වීමේ පනත පවා අහෝසි කිරීමට රජය කල්මරමින් සිටින බවද පවසා ඇත. අග්‍රාමාත්‍ය රනිල් වික්‍රමසිංහ මහතාට මේ ක්‍රියාවන් ඉටුකිරීම සම්බන්ධයෙන් සාධාරණ වුවමනාවක් ඇතැයි තමන් ඇතුළු දමිළ ජනතාවට හැගී ගියත් ජනපති මෛත්‍රීපාල සිරිසේන මහතා දිගින් දිගටම මෙම ක්‍රියාවලිය අසාර්ථක කිරීමට කටයුතු යොදන බවද ඔහු වැඩිදුරටත් පෙන්වාදී ඇත.