ඉදිරි දින කිහිපය තුළ මෙරට ඉන්ධන හිඟයක් ඇති විය හැකි බවට ඛනිජ තෙල් නීතිගත සංස්ථා නිදහස් සේවක සංගමය අනතුරු අඟවයි.
සංස්ථාවේ සභාපතිවරයාගේ අත්තනෝමතික ක්‍රියාකලාපය මෙම තත්ත්වයට හේතුවන බව ඊයේ(05) පැවති මාධ්‍ය හමුවකදී එහි සභාපති බන්දුල සමන් කුමාර මහතා පැවසීය.
සභාපතිවරයාගේ අත්සනින් නව සැපයුම්කරුවෙකු ලියාපදිංචි කර ඇති බවත් අප්‍රේල් 22 හා 23 වැනිදා වන විට 92 වර්ගයේ ප්‍රෙටල් මෙට්‍රික් ටොන් ගෙන්වීමට තිබුණද එම ඇනවුම අදවන තුරු ඛනිජ තෙල් නීතිගත සංස්ථාවට ලඟා වී නොමැති බවත් හෙතෙම පෙන්වා දුන්නේය.
මේ හේතුවෙන් ඉන්ධන හිඟයක් ඇති වී තිබූ බවත් මේ නිසා ඛනිජ තෙල් නීතිගත සංස්ථාවට හිමිවන පාඩුව රුපියල් මිලියන 120කට වැඩි බවත් ඔහු සඳහන් කළේය.
මේවන විට දින 3කට පමණක් ඛනිජ තෙල් නීතිගත සංස්ථාවට ඉන්ධන ඇති බවත් 07 වැනිදා වනවිට ඉන්ධන නැවක් එන බව දන්වා ඇති බවත් එම නැව නොපැමිණියහොත් අනිවාර්යයෙන් ඉන්ධන හිඟයක් ඇති වන බවත් බන්දුල සමන් කුමාර මහතා වැඩිදුරටත් පැවසී ය.