යාපනය, අච්චුවේලි ප්‍ර දේශයේදී පුද්ගලයන් දෙදෙනෙකු අතුරුදන්වීමේ සිදුවීමක් සම්බන්ධයෙන් චෝදනා එල්ල වී තිබෙන යුද හමුදා සාමාජිකයන් 11 දෙනෙකු ලබන 24 වනදා දක්වා රක්ෂිත බන්ධනාගාරගත කිරීමට යාපනය මහේස්ත්‍රාත් අධිකරණය නියෝග කර තිබේ.
මෙම සිද්ධියට අදාලව පසුගිය 26 වැනිදා ද ලුතිනන් කර්නල්වරයෙකු ඇතුළු යුධ හමුදා සාමාජිකයින් පස් දෙනෙකු රක්ෂිත බන්ධනාගාර ගත කරන ලෙස යාපනය මහේස්ත්‍රාත් අධිකරණය නියෝග කරනු ලැබීය.
1998 වසරේදී අතුරුදන්වී ඇතැයි කියන පුද්ගලයින් දෙදෙනා එල්.ටී.ටී.ඊ. සාමාජිකයින් බවට සැක කෙරෙන අතර, පසුගිය 26 වනදා රක්ෂිත බන්ධනාගාරගත කරන ලද හමුදා නිලධාරීන් පස්දෙනා මීට පෙරද මේ සම්බන්ධයෙන් රක්ෂිත බන්ධනාගාර ගතව සිට පසුව ඇප මත මුදාහැරුණු අයයි. නීතිපතිවරයාගේ උපදෙස් අනුව අදාළ නඩුව නැවත වරක් කැදවීමට තීරණය කර තිබෙන අතර හමුදා නිලධාරීන් මෙලෙස රක්ෂිත බන්ධනාගාර ගත කර ඇත්තේ ඒ අනුවයි.
1998 වසරේ අච්චුවේලී යුද හමුදා කඳවුරට අනුයුක්තව සේවයේ නිරතව සිටි හමුදා සාමාජිකයින් 16 දෙනෙකුට එරෙහිව අතුරුදහන්වූ පුද්ගලයින්ගේ ඥාතීන් විසින් අදාළ නඩුව ගොනුකර තිබේ.