ශ්‍රී ලංකා වරාය අධිකාරියේ නැගෙනහිර පර්යන්තයෙන් 51% කොටසක් රජය භාරයේ තබාගෙන ඉතිරි කොටස පෞද්ගලීකරණය කිරීමට තීරණය කර ඇති බව වරාය හා නාවික කටයුතු අමාත්‍ය අර්ජුන රණතුංග මහතා පවසයි.
පසුගිය රජය සමයේ වරාය අධිකාරියේ ඇතිවී තිබෙන අධික ණයබර හේතුවෙන් වර්ථමානයේ තත්ත්වය සුභදායී නොවන බවත් සදහන් කරන ඇමතිවරයා ආසියානු සංවර්ධන බැංකුව සමග සාකච්ඡා කර වඩා හොද ආයෝජකයෙකු සොයා ගැනීමට කටයුතු කර ඇති බවත්, ඒ අනුව මේ වන විට හොද ආයෝජකයෙකු සොයා ගැනීම සාර්ථක වී ඇති බවද පවසයි.
ඇමතිවරයා මේ බව සදහන් කර ඇත්තේ නෙත් ගුවන්විදුලිය සමග අදහස් දක්වමිනි.
මේ අතර වරාය නැගෙනහිර පර්යන්තය පෞද්ගලිකකරණය කිරීමට එරෙහිව වරාය වෘත්තීය සමිති විරෝධය ඵලකරන අතර, වරාය පොදු සේවක සමිතියේ ප්‍රධාන ලේකම් චන්ද්‍රසිරි මහගමගේ මහතා පවසන්නේ නැගෙනහිර පර්යන්තය විකිණීම තුළින් වරායේ සමස්ථ මෙහෙයුම් පද්ධතියම බිද වැටෙන බවයි.
මෙම විකිණීම නතර නොකරන්නේ නම් දැනට විකිණීමට නියමිත සියලුම ආයතන සමග ඒකාබද්ධ වෙමින් දැවැන්ත අරගලයක් දියත් කරන බවත් ඔහු පවසයි.