මහ බැංකු අධිපති ධුරය සම්බන්ධයෙන් මතුව ඇති ගැටළුව ඉදිරි දින කිහිපය තුළදී සමතයකට පත්කර ගැනීමට ජනාධිපතිවරයා සහ අගමැතිවරයා එකගත්වයකට පැමිණ ඇතිබවත්, ඒ අනුව ඔවුන් දෙදෙනාගේ එකගත්වය මත ඊට සුදුසු පුද්ගලයෙකු තමා විසින් නිර්දේශ කරනු ලබන බවත් මුදල් අමාත්‍ය රවී කරුණානායක මහතා පවසයි.
මේ වනවිට චීනයේ සංචාරයක නිතරවී සිටින මුදල් ඇමතිවරයා ලබන 4 වනදා දිවයිනට පැමිණීමට නියමිත අතර ඉන්පසු මහබැංකු අධිපතිවරයා පත්කිරීමට නියමිතය.
1949 අංක 58 දරන මුදල් නීති පනතේ 11 වන වගන්තියට අනුව මහ බැංකු අධිපතිවරයා නිර්දේශ කිරීමේ බලය හිමිව ඇත්තේ මුදල් ඇමතිවරයාටය. එම නිර්දේශය සලකා බලා මහ බැංකු අධිපති පත් කිරීමේ බලය ජනාධිපතිවරයාට හිමිව තිබේ.
ඒ අනුව, මුදල් අමාත්‍යවරයාගේ නිර්දේශය ලැබීමෙන් පසු අග්‍රාමාත්‍යවරයා සමග සාකච්ඡා කර ජනාධිපති මෛත්‍රිපාල සිරිසේන මහතා විසින් එම පත් කිරිම සිදු කිරීමට නියමිත බව රජයේ ප්‍රවෘත්ති දෙපාර්තමේන්තුව පවසයි.