මෙරට ඇඹුල් කෙසෙල් අස්වැන්නෙන් කිලෝග්‍රෑම් දොළොස්දහස් පන්සීයක (12,500) තොගයක් පළමු වරට ඩුබායි වෙළෙඳපොළ වෙත ලබන 26 වැනිදා නිකුත් කරන බව කෘෂිකර්ම අමාත්‍යාංශය පවසයි.
කෘෂිකර්ම අමාත්‍යාංශයේ කෘෂි අංශ නවීකරණ ව්‍යාපෘතිය (Agriculture Sector Modernization Project–ASMP) මගින් දිවයින පුරා පවත්වාගෙන යන කෘෂි ආදර්ශ උද්‍යාන (Agri – Demonstration Park) වැඩපිළිවෙළ යටතේ ක්‍රියාත්මක රාජංගණය ඇඹුල් කෙසෙල් උද්‍යානයේ කෙසෙල් තොගයක් මෙලෙස අපනයනය කෙරේ.
විදේශ විනිමය ඉපයීම ඉලක්ක කර ගනිමින් රාජංගණය ඇඹුල් කෙසෙල් ව්‍යාපෘතිය ක්‍රියාත්මක වන අතර, ඒ යටතේ අක්කර 200ක ඇඹුල් කෙසෙල් වගාකර ඇත. කෘෂි අංශ නවීකරණ ව්‍යාපෘතිය මගින් ඊට අවශ්‍ය මූල්‍ය ආධාර, නව තාක්ෂණික දැනුම, උපදෙස් හා පුහුණුව ගොවි ජනතාව වෙත ලබා දෙයි.
ලබන 26 වැනිදායින් පසුව සෑම සෙනසුරාදාවකම ඇඹුල් කෙසෙල් කිලෝග්‍රෑම් 12,500 බැගින් ඩුබායි වෙළෙඳපොළට යැවීමට කටයුතු යොදා ඇතැයි කෘෂි අංශ නවීකරණ ව්‍යාපෘතියේ අධ්‍යක්ෂ ආචාර්ය රොහාන් විජේකෝන් පවසයි.