බන්ධනාගාර මාධ්‍ය ප්‍රකාශක බන්ධනාගාර කොමසාරිස් ගාමිණී බී. දිසානායක පවසන්නේ අද (මාර්තු 29) දහවල් අනුරාධපුර එළිමහන් බන්ධනාගාරයේ රඳවා සිටි රැඳවියන් දෙදෙනෙකු පළා ගොස් ඇති බවයි.
මාධ්‍ය ප්‍රකාශකවරයා පවසන්නේ පළා ගිය රැඳවියන් දෙදෙනා එළිමහන් සිරකඳවුරේ ආපන ශාලාවේ සේවය යොදවා සිට ඇති බව ය.
ඔහු සඳහන් කළේ, පළා ගොස් ඇති රැඳවියන් දෙදෙනා අනුරාධපුරේ ශ්‍රාවස්තිපුර ප්‍රදේශයේ සහ කැලණිය ප්‍රදේශයේ පදිංචිකරුවන් බව ය.
හෙරොයින් සම්බන්ධව මෙම රැඳවියන් දෙදෙනා රක්ෂිත බන්ධනාගාරගත කර ඇති බව ත් පළා ගිය එක් රැඳවියෙකුට රු. 5,500 දඩයක් සහිතව මාස 6ක සිර දඬුවමක් සහ අනෙක් රැඳවියා රු. 10,000 දඩයක් සහිතව මාස 2ක සිර දඬුවමක් නියම කර තිබූ බව ත් ඔහු වැඩිදුරට ත් සඳහන් කළේ ය.
පළා ගිය රැඳවියන් අත්අඩංගුවට ගැනීම බන්ධනාගාර නිලධාරීන් මෙහෙයුම් ආරම්භ කර තිබේ.