නව කැබිනට් සංශෝධනය යටතේ අගමැති රනිල් වික්‍රමසිංහ මහතා යටතට පත්කර තිබූ නීතිය හා සාමය කැබිනට් අමාත්‍ය ධුරය සඳහා ෆීල්ඩ් මාර්ෂල් සරත් ෆොන්සේකා මහතාගේ නම ජනපති මෛත්‍රීපාල සිරිසේන මහතා වෙත යොමුකර ඇතැයි එක්සත් ජාතික පක්ෂ ආරංචි මාර්ග සඳහන් කරයි.
එ.ජා.ප.ය. සහ ශ්‍රීලනිපය අතර අවබෝධතා ගිවිසුමට අනුව එක්සත් ජාතික පක්ෂය මෙම නම යෝජනා කර ඇත. එම ගිවිසුමට අනුව නීතිය හා සාමය අමාත්‍යාංශය එක්සත් ජාතික පක්ෂයට අයත් වේ.
සරත් ෆොන්සේකා මහතාගේ නම යෝජනා කළද එම පත්කිරීම බොහෝදුරට කෙරෙන්නේ ජනපතිගේ ජපාන සංචාරයෙන් පසුව බවද එම ආරංචි මාර්ග අනාවරණය කළේය.
ලබන 12 වනදා ජපානයට යන ජනපති නැවත ලබන 15 දා ශ්‍රී ලංකාවට පැමිණෙයි.