ඒකාබද්ධ විපක්ෂය යටතේ සිටින ශ්‍රී ලංකා නිදහස් පක්ෂ මන්ත්‍රීවරුන් නව පක්ෂයේ සාමාජිකත්වය ලබාගතහොත් ඔහුගේ මන්ත්‍රී ධුරය අහෝසි වී යන බව ශ්‍රී ලංකා නිදහස් පක්ෂ මහලේකම් අමාත්‍ය දුමින්ද දිසානායක මහතා පවසයි.
මීට අමතරව ශ්‍රී ලංකා නිදහස් පක්ෂයේ සාමාජිකත්වය ලබා සිටින කුමන තරාතිරමක අයෙකු වුවද නව පක්ෂයේ සාමාජිකත්වය ලබාගැනීමට කටයුතු කළහොත් ඒ මොහොතේම ඔහුගේ පක්ෂ සාමාජිකත්වය අහෝසි වී යන බවද පවසා සිටියේය.
මේ අතර හිටපු ජනාධිපති මහින්ද රාජපක්ෂ මහතාගේ උපන්දිනය යෙදෙන මේ මස 18 වැනිදා ශ්‍රී ලංකා පොදුජන පක්ෂය එළිදැක්වීමේ උත්සවයක් සංවිධානය කර නැතැයි එම පක්ෂයේ මාධ්‍ය ප්‍රකාශක සංජීව එදිරිමාන්න මහතා පවසයි.
හිටපු ජනාධිපතිවරයාගේ උපන් දිනය සමරා නොවැම්බර් 19 වැනිදා අනුරාධපුර ශ්‍රී මහා බෝධිය අසලදී ආගමික වතාවත්වල යෙදීමට හිටපු ජනාධිපතිවරයා සැලසුම් කර තිබෙන බවද ඒ මහතා සදහන් කළේය.