ක්‍රීඩා අමාත්‍යවරයා විසින් පත්කරන ලද රගර් ස්ථාවරකරණ කමිටුව තමන් පිළිනොගන්නා බව ශ්‍රී ලංකා ජාතික ඔලිම්පික් කමිටුව විසින් ජාත්‍යන්තර රගර් සම්මේලනයට ලිපියක් මගින් දැනුම්දී තිබේ.
ශ්‍රී ලංකා ජාතික ඔලිම්පික් කමිටුවේ ලේකම් මැක්ස්වල් ද සිල්වා මහතාගේ අත්සනින් යුතුව අදාළ ලිපිය යොමුකර ඇත.
ශ්‍රී ලංකා ජාතික ඔලිම්පික් කමිටුව එම ලිපිය මගින් වැඩිදුරටත් දැනුම්දී ඇත්තේ මේ වනවිට විසුරුවා ඇති නිලවරණයෙන් බලයට පත්වූ කමිටුව පමණක් පිළිගන්නා බවය.
අදාළ ලිපියේ පිටපත් ජාත්‍යන්තර ඔලිම්පික් කමිටුව, ආසියානු ඔලිම්පික් කමිටුව, ආසියානු රගර් සම්මේලනය සහ ක්‍රීඩා අමාත්‍යංශය වෙත ද යොමුකර ඇත.