ගෑස් පිපිරීම් පිටුපස කුමන්ත්‍රණයක් සිදුවූයේ දැයි සැකයක් මතුවී ඇති හෙයින් ජනාධිපතිවරයා ඒ සම්බන්ධයෙන් රහසිගත විමර්ශනයක් කරන බව මහා මාර්ග අමාත්‍ය ජොන්ස්ටන් ප්‍රනාන්දු මහතා පවසයි.
රටේ සමහර ප්‍රදේශවල ගෑස් සිලින්ඩර පුපුරා ගොස් ඇතත් කොළඹ හතේ, උතුරු පළාතේ,නුවර කුරුණෑගල ප්‍රදේශවල ගෑස් පිපිරීම් සිදුවී නැතැයිද ඔහු සඳහන් කළේය.
අමාත්‍යවරයා මෙසේ පැවසුවේ කුරුණෑගල මලියදේව බාලිකා විද්‍යාලයේ නව දෙමහල් තෙමහල් ගොඩනැගිල්ල සිසු අයිතියට පත් කිරීමේ උත්සවයේදීය.
මේ උත්සවය ඊයේ(5)දින පැවැත්විණ.
ජොන්ස්ටන් ප්‍රනාන්දු මහතා එහිදී මෙසේද සඳහන් කළේය.
“රටේ ජනතාව අතර ගෑස් පිපිරීම් සම්බන්ධයෙන් කුතුහලයක් ඇතිවී තිබෙනවා. ඒ වගේම ගෑස් පාවිච්චියට බය වෙලා ඉන්නවා. මේ ප්‍රශ්නයට ඉදිරි සති කිහිපයේදී විසඳුම් ලැබේවි කියලා මම විශ්වාස කරනවා.අපි මේ අලුත් අවුරුද්දේ ධනාත්මකව හිතලා ඉදිරියට යන්න ඕන. කොවිඩ් වසංගතය නිසා ප්‍රශ්න ගණනාවකට මුහුණ දෙන්න සිදුවුණා. විදේශ සංචිත අඩු වෙලා තිබෙනවා. ඒ නිසා භාණ්ඩ මිල ඉහළ ගිහින් තිබෙනවා.කොවිඩ් වසංගතයෙන් වැඩියෙන්ම බැට කෑවේ පාසල් දරුවන්. ඔවුන්ගේ අධ්‍යාපනය අඩාල වුණා. ඔවුන්ට තමන්ගේ දක්ෂතාවයන් වර්ධනය කර ගැනීමට තිබුණු අවස්ථා මග හැරුණා. ඔවුන් පීඩනයට පත්වුණා. ඉදිරියේදී මේ කොවිඩ් වසංගතයෙන් අපිට ගොඩ ඒමට පුළුවන් වේවි කියලා මා විශ්වාස කරනවා.”