නැව් සංස්ථාවට අයත් මහපොළ නැව දිනකට අමෙරිකන් ඩොලර් දහස බැගින් ගෙවීමේ කුලී පදනම මත කුලියට ලබාගෙන එම මුදල් ගිවිසුම් අත්සන් කළ දිනයේ සිටම ගෙවීම පැහැර හැර නැව විදේශීය වරායක අතහැර දමා රජයට අමෙරිකන් ඩොලර් මිලියන ගණනක පාඩුවක් සිදුකිරීම සම්බන්ධයෙන් පොලිස් මූල්‍ය අපරාධ කොට්ඨාසයට ලැබුණු පැමිණිල්ලක් මත පරීක්ෂණයක් ආරම්භ කර ඇතැයි ආරංචි මාර්ග පවසයි.
නැව් සංස්ථාවට අයත් මහපොළ නැව කුලී පදනම මත දිනකට අමෙරිකන් ඩොලර් දහසක මුදලක් ගෙවීම සඳහා 2011-06-21 දින ට්‍රිපල් එස් නමැති සමාගමක් සමඟ ගිවිසුමක් ඇති කරගෙන ඇත. එම සමාගමේ අධ්‍යක්ෂවරු ලෙස වෛද්‍ය සංජය සේදර සෙනරත්, තුෂාර වික්‍රමආරච්චි සහ මහනාග යන තිදෙනකු ගිවිසුමට අස්සන් කර නැව ලබාගෙන ඇති බවත් 2011.06.21 සිට 2013.05.12 දක්වා ට්‍රිපල් එස් සමාගම මෙහෙයුම් කටයුතු සිදුකර පසුව කෙන්යාවේ මෙග්බාසා වරායේ නැව අතහැර දමා ඇති බවත් ගිවිසුම අස්සන් කළ දිනයේ සිට නැව අතහැර දමන ලද දිනය දක්වා ගිවිසගත් ආකාරයට නැව් සංස්ථාවට කිසිදු මුදලක් ගෙවා නොමැති බවත් කපිතාන් ප්‍රියලාල් මැදගෙදර විසින් කරනු ලැබූ පැමිණිල්ලේ සඳහන්ව ඇත.
මේ සම්බන්ධයෙන් නැව් සංස්ථාවේ නීති අංශය විසින් ජාතික බේරුම් මධ්‍යස්ථානයට 2014.01.24 දින පැමිණිල්ලක් කරමින් මේ සමාගම විසින් නැව් සංස්ථාවට මිලියන ගණනක මුදලක් වංචා කර ඇති බවද සඳහන් කොට ඇතැයි උසස් නිලධාරියෙක් පැවසී ය.