මහ බැංකුවේ භාණ්ඩාගාර බැඳුම්කර සිද්ධිය සම්බන්ධව රිමාන්ඩ් භාරයට පත් කළ හිටපු පාර්ලිමේන්තු මන්ත්‍රී රවී කරුණානායක ඇතුළු අට දෙනෙකු වැලිකඩ බන්ධනාගාර පරිශ්‍රයේ පෙර පැවති කාන්තා අංශයේ පිහිටුවා ඇති නිරෝධායන මධ්‍යස්ථානය වෙත යොමු කර තිබේ.
බන්ධනාගාර මාධ්‍ය ප්‍රකාශක, බන්ධනාගාර කොමසාරිස් චන්දන ඒකනායක මහතා පැවසුවේ අද (18) දින මොවුන් සියලු දෙනාටම PCR පරීක්ෂණයන් සිදු කිරීමට නියමිත බවයි.
PCR පරීක්ෂණයෙන් පසු කොවිඩ් 19 ආසාදනය වී ඇති බවට තහවුරු වුවහොත් කන්දකාඩු නිරෝධායන මධ්‍යස්ථානය වෙත යොමු කිරීමට බලාපොරොත්තු වන බවත් වෛරසය වැළඳී නොමැති බවට තහවුරු වුවහොත් ඔවුන් කොළඹ රිමාන්ඩ් බන්ධනාගාරය වෙත යොමු කිරීමට කටයුතු කරන බවත් චන්දන ඒකනායක මහතා තවදුරටත් පැවසීය.
බැඳුම්කර වංචාව සම්බන්ධයෙන් විශේෂ මහාධිකරණයේ විභාගවන නඩුවට අදාළව රවී කරුණානායක මහතා ඇතුළු සැකකරුවන් 8 දෙනා ඊයේ (17)දින රක්ෂිත බන්ධනාගාරගත කිරීමට නියෝග කෙරුණි.
එහිදී, මාර්තු මස 23 වනදා දක්වා රක්ෂිත බන්ධනාගාරගත කළ හිටපු මුදල් අමාත්‍ය රවී කරුණානායක මහතා ඇතුළු 8 දෙනා බන්ධනාගාරයේ නිරෝධායන මධ්‍යස්ථානය වෙත යොමු කෙරුණි.