රට පාවා දෙන්නන්ට, අයුක්තියට, අසාධාරණයට, දූෂණයට හා වංචාවට එරෙහිව යන ගමන කිසිසේත් අතර මඟ නතර නොකරන බව ජනාධිපති මෛත්‍රීපාල සිරිසේන මහතා ප්‍රකාශ කළේය.
තමාට නැති වන්නට ඇත්තේ ජනාධිපති ධුරය හා ජීවිතය යන දෙකෙන් එකක් හෝ ඒ දෙකම පමණක් බව පැවැසූ ජනාධිපතිවරයා තමා සෑමවිටම දේශපාලනයේ උඩුගම් බලා පිහිනා ගිය බවත් පැවැසීය.
ජනාධිපතිවරයා මේ අදහස් පළ කළේ ජාතික මැණික් හා ස්වර්ණාභරණ අධිකාරියේ රජත ජයන්ති ජනාධිපති සම්මාන උළෙලේ ප්‍රධාන ආරාධිතයා වශයෙන් ඊයේ (23) සවස එක්වෙමිනි.
තමා පාර්ලිමේන්තුවේ නොමැති අවස්ථාවේදී තමාවත් තම දියණිය ලියූ ග්‍රන්ථයත් දැඩිව විවේචනය කිරීම සදාචාරාත්මක නොවන බවත් ජනාධිපතිවරයා පෙන්වා දුන්නේය.
රනිල් සමඟ අසාර්ථක දීගය යනුවෙන් ග්‍රන්ථයක් තමන් ලබන ජනවාරියේ එළිදැක්වීමට සූදානමින් සිටින බැවින් එම ග්‍රන්ථයත් කියවන්නැයි විවේචකයන් හට ආරාධනා කරන බවත් ජනාධිපතිවරයා ඉල්ලා සිටියේය.