ශ්රී දළදා පෙරහැරට සහභාගී කරවා ගැනීම සදහා ප්‍රමාණවත් අලි ඇතුන් නොමැති බැවින් පෙරහැර නිසි ලෙස පැවැත්වීමට නොහැකී වී ඇති බවත්, දැනට අත්අඩංගුවේ පසුවන අලි ඇතුන් පෙරහැර සදහා මුදාහරින ලෙසත් බල කරමින් හීලෑ අලි ඇතුන් සුරැකීමේ සංවිධානය අද (09) මහනුවර නගරයේදී සත්‍යග්‍රහයක් ආරම්භ කර තිබෙන බව වාර්තා වනවා.
සත්‍යග්‍රහය සදහා එම සංගමයේ සභාපති පූජ්‍ය මාගලකන්දේ සුදත්ත හිමියන් සහ ඇත්ගොව්වන් පිරිසක් සහභාගී වී සිටින අතර, අත්අඩංගුවේ සිටින අලි ඇතුන් මුදා නොහරින්නේ නම් දැනට සිටින අලි ඇතුන්ද පෙරහැරට සහභාගී කිරීමෙන් වැළකී සිටින බවයි එම පිරිස සදහන් කරන්නේ.
ඊයේ ආරම්භ වූ පෙරහැර සදහා සහභාගී වී ඇත්තේ අලි ඇතුන් 30කට ආසන්න පිරිසක් පමණක් බවයි ඔහුන් සදහන් කරන්නේ. පෙරහැර සදහා මනා ලෙස පුහුණු වූ හීලෑ අලි අතුන් 39ක් පමණ මේවනවිට අත්අඩංගුවේ පසුවන අතර, විධායක බලතල යොදාගෙන එම අලි ඇතුන් පෙරහැර සදහා මුදාහරින ලෙස සත්‍යග්‍රහයේ නියුතු පිරිස ජනාධිපතිවරයාගෙන් ඉල්ලා සිටී.