හොරොව්පොතාන යාන්ඔය මුස්ලිම් මහ පල්ලියේ සාමාජික මුදල් නොගෙවීමේ සිද්ධියක්‌ මත දෙපිරිසක්‌ අතර ඇතිවූ ගැටුමක් සමථයකට පත් කිරීමට මැදිහත් වූ ග්‍රාම නිලධාරියෙකුට එම මුස්ලිම් පල්ලියේදී පහරදුන් පුද්ගලයන් දෙදෙනකු හොරොව්පොතාන පොලිසිය මගින් ඊයේ (7 දා) උදේ සැකපිට අත්අඩංගුවට ගෙන ඇත.
ඉකුත් 5 වැනිදා (සිකුරාදා) දවල් එම පල්ලියේ පැවැති ඉස්‌ලාම් ආගමික වතාවත්වලට සහභාගි වූ අවස්‌ථාවේ ග්‍රාම නිලධාරිවරයා පහර කෑමට ලක්‌ව ඇති අතර එහිදී පහරකෑමට ලක්‌වූ යාන්ඔය වෙලන්ගහ උල්පත ග්‍රාම නිලධාරි තිස්‌පස්‌ හැවිරිදි මොහොමඩ් සුල්තාන් මොහොඩ් සාසීම් මහතා ප්‍රතිකාර සඳහා හොරොව්පොතාන රෝහලට ඇතුළත්ව ඇත.
ඔහුට පහරදුන් බව කියන අවුරුදු පනස්‌ පහ සහ හැට පහ වයසේ පසුවන සැකකරුවන් දෙදෙනා යාන්ඔය ප්‍රදේශයේ පදිංචිකරුවන් බව පොලිස් පරීක්‍ෂණවලදී අනාවරණය වී තිබේ.
හොරොව්පොතාන පොලිසිය විසින් එම සැකකරුවන් දෙදෙනා ඊයේ (07 දා) කැබිතිගොල්ලෑව මහෙස්‌ත්‍රාත් අධිකරණය හමුවට ඉදිරිපත් කිරීමට නියමිතව තිබිණි.
-දිවයින