සමාජය තුළ වෛරය, ජාතිවාදය, වර්ගවාදය පතුරවන, මෙන් ම ගැටුම් ඇති කරන අයගේ ක්‍රියා වැළැක්විය හැකි ආකාරයේ නීති ගෙන ඒම කෙරෙහි රජයේ අවධානය යොමු වී ඇතැයි අගමැති රනිල් වික්‍රමසිංහ මහතා ප්‍රකාශ කරයි.
ඊට අදාළ නීති පද්ධතියක් ගෙන ඒම සම්බන්ධයෙන් මේ වන විට නීතිය හා සාමය අමාත්‍යාංශය සහ නීතිපති දෙපාර්තමේන්තුව සමග එක්ව සාකච්ඡා කරමින් සිටින බව ද ඒ මහතා පැවැසීය.
කොළඹ ඉසිපතන විද්‍යාලයේ ඊයේ (14) පැවැති උත්සවයක් අමතමින් අගමැතිවරයා මේ කරුණු අනාවරණය කරන ලදී.
ඕනෑම පුද්ගලයෙකුට තව කෙනෙකුගේ ප්‍රතිපත්ති විවේචනය කිරීමේ හැකියාව තිබුණ ද, කෙනෙකුට තවත් කෙනෙකු මරා දමන්න යැයි පවසමින් වෛරී භාෂාව පැතිරවීමට කිසිදු අවස්ථාවක් නැතැයි රනිල් වික්‍රමසිංහ මහතා මෙහිදී පෙන්වා දුන්නේය.
එංගලන්තය වැනි රටවල ද එවැනි වෛරී අදහස් පැතිරවීම වැළැක්වීම සඳහා නීති පවතින බැවින්, එවැනි රටවල ජාතික හෝ ආගමික වශයෙන් වෛරය පතුරුවන්නට හැකියාවක් ලැබි නැතැයි ද, අගමැති රනිල් වික්‍රමසිංහ මහතා මෙහිදී ප්‍රකාශ කර ඇත