අර්ජුණ රණතුංග මහතා වරාය හා නාවික අමාත්‍ය ධුරයෙන් ඉවත් කරන තුරු වරාය සේවක වෘත්තීය සටන අඛණ්ඩව ගෙන යන බව වරාය ඒකාබද්ධ වෘත්තීය සමිති සන්ධානයේ සම කැදවුම්කරු හා වරාය ජාතික සේවක සංගම් ශාඛාවේ සභාපති උදේනි කළුතන්ත්‍රි මහතා පවසයි.
ඒ අනුව දැනට තාවකාලිකව අත්හිටුවා තිබෙන් වෘත්තීය සමිති ක්‍රියාමාර්ග සටන ඉදිරි දින දෙක තුළ නැවත ආරම්භ කිරීමට කටයුතු කරන බවද ඔහු පවසයි.
මේ වන විට වරායට රුපියල් කෝටි 800 ක පමණ පාඩුවක් සිදුකරමින් අත්තනෝමතික පවුල් පාලනයක්‌ ගෙන යන ඇමැති රණතුංග මහතා වහාම ඇමැති ධුරයෙන් ඉවත් කරන ලෙස රජයට බල කරමින් ඉදිරියේදී සමස්‌ත වරාය සේවක වැඩවර්ජනයක්‌ ක්‍රියාත්මක කරන බවද හෙතෙම පැවැසීය.
වරාය සේවක වෘත්තීය අයිතිවාසිකම් වෙනුවෙන් වෘත්තීය සමිති ක්‍රියාමාර්ගවල නිරත වෘත්තීය සමිති නායකයන්, නිලධාරීන් ඇතුළු සේවකයන් හට තර්ජනය කරමින් බැණ වදිමින් පළිගනිමින් දැඩි මර්දනකාරී පාලනයක්‌ ගෙන යන ඇමැතිවරයා සහ ඔහුගේ සොහොයුරු වරාය සභාපතිවරයා ඉවත්කරන තුරු වරාය ඒකාබද්ධ වෘත්තීය සමිති සන්ධානයට අයත් වෘත්තීය සමිති 17 ක් මෙම සටන ගෙන යන බවද කළුතන්ත්‍රි මහතා වැඩිදුරටත් පැවැසීය.
දිවයින