වෙඩිතබා මනුෂ්‍ය ඝාතනයක් සිදුකිරීමට තැත් කිරීමේ සිද්ධියකට ආධාර අනුබල දුන් සැකකරුවෙක් අත්අඩංගුවට ගෙන තිබේ.
ඊයේ (14) උදෑසන මාවනැල්ල පොලිස් වසමේ බටපොල ප්‍රදේශයේදී සැකකරුව අත්අඩංගුවට ගැනීමට පොලිස් විශේෂ කාර්ය බළකායේ ජයවර්ධනපුර කඳවුරේ නිලධාරීන් සමත්වී තිබේ.
පසුගිය 10 වන දින ගල්කිස්ස පොලිස් ස්ථානයට වාර්තා වී තිබූ රත්මලාන ඥානේන්ද්‍ර පාර ප්‍රදේශයේ වෙඩි තබා මනුෂ්‍ය ඝාතනයකට තැත් කිරීමේ සිද්ධියකට අදාළ වෙඩික්කරුට, එම අපරාධය සඳහා යොදාගත් මෝටර් රථය ලබාදීම සම්බන්ධව මෙම අත්අඩංගුවට ගැනීම සිදුකළ බව පොලිස් විශේෂ කාර්ය බළකා නිලධාරීන් පවසයි.
අත්අඩංගුවට ගන්නා අවස්ථාවේදී සැකකරු සන්තකයේ තිබී හෙරොයින් ග්‍රෑම් 15යි මිලිග්‍රෑම් 680ක් සහ ජංගම දුරකථනයක් සොයාගෙන ඇත.
අත්අඩංගුවට ගත් සැකකරු අවුරුදු 29ක් වන මැණික්දිවෙල ප්‍රදේශයේ පදිංචිකරුවෙකි.
සැකකරු සම්බන්ධව මාවනැල්ල පොලීසිය සහ ගල්කිස්ස පොලීසිය වැඩිදුර විමර්ශන සිදුකරයි.