ශ්‍රී ලංකාවේ මානව හිමිකම් ප්‍රවර්ධනයේ හා සංහිඳියාවේ යම් ප්‍රගතියක් පෙන්නුම් කරන බව ලන්ඩනය පදනම් කරගත් ලොව ප්‍රමුඛතම දෙමළ ඩයස්පෝරා සංවිධානයක් වන “ගෝලීය දෙමළ සංසදය”පවසයි.
පසුගියදා නිමාවට පත්වූ එක්සත් ජාතීන්ගේ මානව හිමිකම් සමුළුවේ 32 වැනි සැසිවාරයට ජගත් මානව හිමිකම් පිළිබඳ මහ කොමසාරිස් ෂහිද් රා අද් අල් හුසෙයින් කුමරු විසින් ශ්‍රී ලංකාවේ මානව හිමිකම් තත්ත්වය පිළිබඳ ඉදිරිපත් කළ වාර්තාව සාදරයෙන් පිළිගන්නා අතරම ශ්‍රී ලංකාව සැලකිය යුතු ප්‍රගතියක් අත්පත් කරගෙන ඇති බව ගෝලීය දෙමළ සංසදය විසින් අද (06) නිකුත් කළ නිවේදනයක සදහන් වේ.
ද්‍රවිඩ ජනතාවගේ ඉඩම් වලින් ආරක්ෂක හමුදා ඉවත් කොට එකී ඉඩම් එහි සැබෑ හිමිකරුවන්ට ලබාදීම, දැනට රඳවා සිටින පිරිස් සඳහා නඩු පැවරීම හෝ නිදහස් කරලීම, උතුරු-නැගෙනහිර පළාත්වල හමුදා සීමා කිරීම, ත්‍රස්ත මර්දන පනත අහෝසි කිරීම, වින්දිතයින් ආරක්ෂා කිරීම සඳහා යම් යම් ක්‍රියා මාර්ග ගැනීම සිදුවෙමින් පවත්නා බව ඔවුන් සිය නිවේදනයෙන් පෙන්වාදී තිබේ.
සංහිඳියාව ප්‍රවර්ධනය කිරීම සඳහා යම් යම් ව්‍යවස්ථාමය ප්‍රතිසංස්කරණයන් සිදුකෙරෙමින් පැවතීම පිළිබඳ ද තම ප්‍රසාදය හිමිවන බවත් ගෝලීය දෙමළ සංසදය සඳහන් කරයි.
කෙසේ වෙතත් ජාත්‍යන්තර ප්‍රජාව විසින් දිගු කාලීනව ශ්‍රී ලංකාවේ සාමය, සාධාරණත්වය හා දේශපාලන බලය බෙදාගැනීම සඳහා කරනු ලබන මැදිහත්වීම තවදුරටත් සිදුවිය යුතු බවද ඔවුන් වැඩිදුරටත් තම නිවේදනයෙන් පෙන්වා දෙයි.