අද (26)දින පෙරවරුවේ දඹුල්ල වීර ඩෙන්සිල් කොබ්බෑකඩුව මූලික රෝහල ඉදිරිපිට දී හෙද නිලධාරීන් පිරිසක් නිහඬ විරෝධතාවක නිරත විය ඒ මධ්‍යම පළාත් සභාව මඟින් තමන්ට ලබා දීමට තිබූ දීමනා කප්පාදු කිරීම සහ ප්‍රවාහන පහසුකම් ලබා නොදීම සම්බන්ධයෙන් විරෝධය පළ කරමිනුයි.
“සුව විරුවන් රූපවාහිනියට පමණක්ද” “රාජකාරිය ගන්නා තෙක් සෞඛ්‍ය සේවය සුව විරු වේ” යන ආදී වදන් සහිත පුවරු ප්‍රදර්ශනය කරමින් මෙම හෙද නිලධාරීන් විරෝධතාවයේ නිරත වෙන අයුරු දක්නට ලැබිණි.
මෙම අවස්ථාවට දඹුල්ල මූලික රෝහලේ හෙද නිලධාරීනියන් හා නිලධාරීන් 20 කට අධික සංඛ්‍යාවක් සහභාගී ව තිබූ අතර එහිදී අදහස් දැක්වූ සමස්ත ලංකා හෙද නිලධාරීන්ගේ සංගමයේ දඹුල්ල ශාඛාවේ ලේකම් සමන් විජේරත්න මහතා කියා සිටියේ, මධ්‍යම පළාත් සභාව මඟින් තමන්ට ගෙවීමට නියමිතව තිබූ දීමනා රැසක් මේ වන විට කප්පාදු කර ඇති බවත් තමන්ට නිසියාකාරව මේ වන තෙක් ප්‍රවාහන පහසුකම් ලබා නොදීම හේතුවෙන් මෙම නිහඬ විරෝධතාවය පවත්වන බවයි.
එසේම මෙම නිහඩ විරෝධතාවයෙන් අනතුරුව හෝ තමන්ට නිසියාකාරව ප්‍රවාහන පහසුකම් ලබාදෙන ලෙසද හෙතෙම ඉල්ලීමක් කළේය.