කෝවිඞ් 19 ආසාදනය වූ, කන්දකාඩු නිරෝධායන මධ්‍යස්ථානයේ සේවයේ යෙදුණ යුද හමුදාවේ තිදෙනා ඇසුරු කළ පුද්ගලයන් වශයෙන් හඳුනාගත් 60දෙනෙකු නිවෙස් තුල නිරෝධායනයට යොමුකළ බව සබරගමු පළාත් සෞඛ්‍ය සේවා අධ්‍යක්‍ෂ වෛද්‍ය කපිල කන්නන්ගර මහතා පවසයි.
කොරෝනා ආසාදනය වූ තිදෙනා රත්නපුර දේවාලේගාව, කුරුවිට නඩුකාරදෙණිය සහ ඇහැලියගොඩ තොරණගොඩ පදිංචිකරුවෝ වෙති.
එම පුද්ගලයන් ඇසුරු කළ ආරක්‍ෂක අංශවල සේවය නියුතු බලංගොඩ, කොළොන්න, උඩවලව ප්‍රදේශවල තිදෙනකු සහ පැල්මඩුල්ල ප්‍රදේශයේ පුද්ගලයන් දෙදෙනකු පීසීආර් පරීක්‍ෂණ සහ සුදුසු නිරෝධාන ක්‍රියාවලිය සඳහා නිරෝධායන මධ්‍යස්ථාන කරා යොමුකර ඇතිබවත් සබරගමු පළාත් සෞඛ්‍යසේවා අධ්‍යක්‍ෂවරයා පැවසුවේය.
ආසාදිත තිදෙනාගේ පවුල්වල සාමාජිකයන් සහ එම තිදෙනා ඇසුරුකළ අය, නිවෙස්වල නිරෝධායනයට යොමුකළ පිරිස අතර සිටින බව සෞඛ්‍ය අංශ සඳහන් කරයි. එමතිදෙනාගෙන් අයෙකු මෑත දිනයකදී රත්නපුර ඇලෝසියස් ජාතික පාසලේ සීවලී මධ්‍ය විද්‍යාලයේ යන පාසල්වල කාර්යාලයන්ට පැමිණි බවත් සෞඛ්‍ය අංශ වෙත වාර්තාවී ඇති බැවින් එම පාසල්වල කාර්යාලයන්හි එදින සිටි ගුරුවරුන් සහ අනධ්‍යයන සේවක පිරිසත් නිවෙස් තුළ නිරෝධානයට යොමුකළ බව සබරගමු පළාත් සෞඛ්‍ය සේවා අධ්‍යක්‍ෂවරයා තවදුරටත් කියාසිටියේය.