ද්‍රවිඩ ජාතික සන්ධානයේ අභ්‍යන්තර බල ගැටුම මේ වන විට පුපුරා ගොස් තිබෙන අතර ආර් සම්බන්ධන්ගේ පාර්ශවයට එරෙහිව උතුරු පළාත් මහ ඇමති සීව.වී. විග්නේශ්වරන් සහ ද්‍රවිඩ ජාතික සන්ධානයේ තවත් ප්‍රබලයන් කිහිපදෙනෙකු‍ගේ ප්‍රමුඛත්වයෙන් ‘දෙමළ ජනතා සභාව’ නමින් නව පෙරමුණක් ඊයේ 20 පිහිටුවා ගන්නා ලදි.
යාපනේ පුස්තකාලයේ රැස්වී පිහිටුවාගන්නා ලද එම නව සංවිධානයට දෙමළ ජාතික සන්ධානයේ හවුල්කාර ප්ලොට් සංවිධානයේ නායක ධර්මලිංගම් සිද්ධාත්ථන් මන්ත්‍රීවරයා, ඊපීආර්එල්එෆ් සංවිධානයේ සුරේෂ් ප්‍රේමචන්ද්‍රන් හිටපු මන්ත්‍රීවරයා සහ දෙජාස වෙතින් වෙන්වී පිහිටුවා ගනු ලැබූ දෙමළ ජාතික ජනතා පෙරමුණේ නායක ගජේන්ද්‍රකුමාර් පොන්නම්බලම් ද ඇතුලත් වෙයි. උතුරේ සිවිල් සංවිධාන හා ආගමික නියෝජිතයන් නව පෙරමුණට සහය පල කර ඇති බවද වාර්තා වෙයි.
විපක්ෂ නායක ආර්.සම්බන්ධන් ප්‍රමුඛ දෙමළ ජාතික සන්ධානය දෙමළ ජනතාවගේ ගැටළුවල විසදුම් සොයාගෙන ගිය ක්‍රියාවලි අඩ පණ වී ඇති බැවින් ඊට විකල්පයක් ලෙස මෙම සංවිධානය ගොඩ නගන බවයි ද්‍රවිඩ ජාතික සන්ධානයේ හිටපු පාර්ලිමේන්තු මන්ත්‍රී සුරේෂ් ප්‍රේමචන්ද්‍රන් ප්‍රකාශ කර ඇත්තේ.
උතුරේ අර්බුධයට පිළිගත හැකි ස්ථීර දේශපාලන විසදුමක් ලබා ගැනීම, උතුරේ ඉඩම් දෙමළ ජනතාවට යළි පවරා දීම, උතුරේ ආරක්ෂක අංශ අඩු කිරීම, නැවත පදිංචි කිරීම ඇතුළු අර්බුද වලට විසදුම් සෙවීම සදහා ‘දෙමළ ජනතා සභාව’ කමිටු දෙකක් පත් කර ඇති අතර මෙකී සංවිධානයේ ඉදිරි ක්‍රියා ද්‍රවිඩ ජාතික සන්ධානයට අභියෝගයක් වනු ඇති බවයි සුරේෂ් ප්‍රේමචන්ද්‍රන් වැඩි දුරටත් පවසා ඇත්තේ.