තමා කෘෂිකර්ම, වනජීවී සහ වන සංරක්ෂණ අමාත්‍ය ධූරයෙන් ඉල්ලා අස්වන බව කෘෂිකර්ම අමාත්‍ය මහින්ද අමරවීර මහතා පවසයි.
ඔහු සඳහන් කළේ, ඉන්දීය ණය ආධාර යටතේ මෙරටට ආනයනය කළ පොහොර තොගය නිල වශයෙන් භාර ගැනීමෙන් අනතුරුව තමා අමාත්‍ය ධූරයෙන් ඉවත් වන බව ය.
ඉන්දීය සහන ණය යෝජනා ක්‍රමය යටතේ ශ්‍රී ලංකාවට සැපයෙන යූරියා පොහොර තොගය නිල වශයෙන් රජයට භාර දීම අද (ජූලි 10) සිදු කිරීමට නියමිත ය.
එම කටයුතු පෙරවරු 10.00ට ශ්‍රී ලංකා වරාය අධිකාරියේ ඊ.සී.ටී. දෙක පර්යන්තයේ දී සිදු කිරීමටයි නියමිතව ඇත.
ශ්‍රී ලංකාවේ ඉන්දීය මහ කොමසාරිස් ගෝපාල් බාග්ලේ ඇතුළු පිරිසක් මෙම අවස්ථාවට එක්වීමට නියමිත ය.
යූරියා පොහොර මෙට්‍රික් ටොන් 40,000ක් රැගත් නෞකාව ඊයේ (ජූලි 9) කොළඹ වරායට ළඟා වූ අතර, පොහොර ගොඩ බෑම ඊයේ දිනයේදී ම සිදු කෙරිණි.
ඒ අනුව, එම පොහොර තොගය රජයට භාර දීමෙන් අනතුරුව අද දිනයේදී ම ඒවා ගොවිජන සේවා මධ්‍යස්ථාන 566ක් මගින් ගොවීන් වෙත බෙදා හැරීමට සැලසුම් කර තිබේ.