පසුගියදා 23වනදා කොල්ලුපිටියේදී අත්අඩංගුවට ගත් ලංකාවේ විශාලතම හෙරෝයින් තොගය ශ්‍රී ලංකාවට එවීම සම්බන්ධයෙන් දැනට ඩුබායි රාජ්‍යයේ රැදී සිටින කොස්ගොඩ සුජී ඇතුළු පස් දෙනෙක් අත්අඩංගුවට ගැනීමට ජාත්‍යන්තර පොලීසියට විවෘත වරෙන්තුවක් නිකුත් කර තිබේ.
ඒ අද එම මත්ද්‍රව්‍ය තොගය සමඟ අත්අඩංගුවට ගත් සැකකරුවන් දෙදෙනා අධිකරණයට ඉදිරිපත් කිරීමෙන් පසුව කොටුව මහේස්ත්‍රාත්වරිය විසින් මෙම නියෝග කර තිබේ.
මෙලෙස ජාත්‍යන්තර පොලීසියට ව‍රෙන්තු නිකුත් කර ඇත්තේ ජගමුනි සුජීව ද සිල්වා, ඇන්ටනි මයිකල් මොරිල්, මොහොමඩ් ශිරාම් බසිත්, මකීල් අබ්දුල් රහීම් සහ බංගලාදේශ් ජාතික අහමඩ් හුසෙන් යන සැකකරුවන් පස් දෙනාටයි.
මෙම සැකකරුවන් පස් දෙනා ගැන තොරතුරු අනාවරණයවී ඇත්තේ දැනට අත්අඩංගුවේ පසුවන සැකකරුවන් දෙදෙනා විසින් ලබා දුන් තොරතුරු අනුවය.