ජාතික වශයෙන් විසඳිය යුතු අර්බුද රැසක් තිබිය දී මෙරට ප්‍රධාන දේශපාලන පාර්ශව දෙකටම තම පැවැත්ම සඳහා ජාතිවාදය අවශ්‍ය කරන බව මේ දිනවල ඉතා පැහැදිළිව පෙනී යන්නේ යැයි ජනතා විමුක්ති පෙරමුණේ නායක අනුර කුමාර දිසානායක ඊයේ (06) පැවැති මාධ්‍ය හමුවක දී කීය.
ජනතාවගේ මූලික අවශ්‍යතාවයන් පිරිමැසීමටත් ප්‍රජාතන්ත්‍රීය අයිතිවාසිකම් ලබා දීමටත් අසමත් වත්මන් රජය ආර්ථික වශයෙන් විශාල වශයෙන් අසමත්කම් පෙන්වා ඇති අතර මේ දිනවල පවත්නා සිංහල – මුස්ලිම් අසමගිය තම අසාර්ථකත්වය වසා ගැනීම සඳහා ප්‍රයෝජනයට ගන්නා බවද පැවසීය.
මේ අතර බණ්ඩාරවෙල බස් රථයක අත්බෝම්බයක් පිපිරුණු වේගයෙන්ම එය කොටි සංවිධානයේ නැගිටීමක් ලෙස පරාජිත දේශපාලඥයන් විසින් රට පුරා පතුරුවා හැරියේ ද තම පැවැත්මට ජාතිවාදය අවශ්‍ය නිසා යයි ද දිසානායක මහතා කීය..
රට තුළ මෙතරම් ප්‍රශ්න තිබිය දී දැන් ආණ්ඩුවට ඇත්තේ අගමැතිවරයාට තවදුරටත් ධුරය දැරිය හැකිද නැතිද යන්න පිළිබඳ ගැටලුව බවත් ජනාධිපතිවරයාට ඇත්තේ යටිපූට්ටු දේශපාලනික ක්‍රියා තවදුරටත් පවත්වාගෙන යන්නේ කෙසේද යන ගැටළුව බවත් ඔහු පැවසීය.