දේශපාලන සහ ආර්ථික වශයෙන් වැදගත් හා ශක්තිමත් තීන්දු කිහිපයක් ජනාධිපතිවරයා විසින් ඉදිරි සති කිහිපය ඇතුළත දී ගන්නා බව මුදල් රාජ්‍ය අමාත්‍ය ලක්‍ෂ්මන් යාපා අබේවර්ධන මහතා පැවසීය.
ජනාධිපති මෛත‍්‍රීපාල සිරිසේන මහතා වසර දෙකක් පුරා හැමදේටම ඉඩ දී තමන්ගේ ප‍්‍රජාතන්ත‍්‍රවාදී ස්වරූපය පවත්වාගෙන ගිය නමුත් ඉදිරි වසර හතර ඇතුළත දී හෝ තමන් භාරගත් වගකීම ඉටුකළ යුතු නිසා මෙම තීන්දු ගන්නා බව ද ලක්‍ෂ්මන් යාපා අබේවර්ධන මහතා සඳහන් කළේය.
මෙම තීරණ සමහරුන්ට තිත්ත වීමටත්, සමහරුන්ට හොඳ වීමටත් හැකි බව ද රාජ්‍ය අමාත්‍යවරයා ප‍්‍රකාශ කළේය. රාජ්‍ය අමාත්‍ය මේ බව පැවසුවේ මුදල් අමාත්‍යාංශයේ පිහිටි සිය කාර්යාලයේදී අද (23) පැවති මාධ්‍ය හමුවක් අමතමිනි.
රටේ අනාගතය යහපත් කිරීම, රජය ස්ථාවර කිරීම, දේශපාලන ස්ථාවරත්වය ඇතිකිරීම මෙන්ම ශ්‍රී ලංකා නිදහස් පක්‍ෂයේ ස්ථාවරත්වය ඇතිකරගැනීම මෙම තීන්දු තීරණවල බලාපොරොත්තු වන බව කී ලක්‍ෂ්මන් යාපා අබේවර්ධන මහතා පසුගිය වසර දෙක තුළ සතුටු විය හැකි මෙන්ම සතුටු විය නොහැකි කාරණා ද සිදුවී ඇතැයි සඳහන් කළේය.