දඹුල්ල නගරයට අංගසම්පූර්ණ නව රෝහලක් ඉදිකිරීම සඳහා ඓතිහාසික රංගිරි දඹුලු රජමහ විහාරස්ථානය සතු අක්කර 5 ක භූමි ප්‍රමාණයක් රජයට බාරදීම සිදු කෙරිණි.
ඒ අනුව ඓතිහාසික රංගිරි දඹුලු රජමහ විහාරස්ථානයේ සහ ශ්‍රී විෂ්ණු දේවාලයේ භාරකාර සියම් මහා නිකායේ අස්ගිරි පාර්ශවයේ මාතලේ දිසාවේ උප ප්‍රධාන සංඝනායක අඹගස්වැව රාහුල නාහිමියන් විසින් දඹුල්ල රජ මහා විහාරස්ථානය පිටුපස අක්කර 05ක බිම් කොටස රාජ්‍ය සේවා පළාත් සභා හා පළාත් පාලන ඇමති ජනක බණ්ඩාර තෙන්නකෝන් මහතා වෙත පෙන්වා දීම සිදුකරන ලදී.
දඹුල්ල නගරයේ මධ්‍යයේ පිහිටා ඇති රෝහලේ ඉඩකඩ ප්‍රමාණවත් නොවීම නිසා අසීරුතාවයකට පත්ව සිටි අවස්ථාවක ජනක බණ්ඩාර තෙන්නකෝන් මහතාගේ ඉල්ලීමක් පරිදි දඹුලු රජමහ විහාරස්ථානය සතු මෙම වටිනා ඉඩම රෝහල සඳහා පරිත්‍යාග කිරීමට තමා තීරණය කළ බව ඓතිහාසික රන්ගිරි දඹුලු රජ මහා විහාරස්ථානය ශ්‍රී විෂ්ණු දේවාලයේ භාරකාර සියම් මහා නිකායේ අස්ගිරි පාර්ශ්වයේ මාතලේ දිසාවේ උප ප්‍රධාන සංඝනායක අඹගස්වැව රාහුල හිමියෝ පවසති.
අමාත්‍යවරයා මුලින්ම නාහිමියන් බැහැදැක උන්වහන්සේගේ සමග දඹුලු විහාරය ආසන්නයේම පිහිටි මෙම භූමිය නිරීක්ෂණය සඳහා පිටව ගිය අතර අග්‍රාමාත්‍යවරයා සමග සහ සෞඛ්‍ය අමාත්‍ය පවිත්‍රා මහත්මිය සමඟ සාකච්ඡා කර ජාතික රෝහලක් මෙම ස්ථානයේ ඉදි කිරීම සඳහා අවශ්‍ය පියවර ගන්නා බව සඳහන් කළේය.
දැනට දඹුල්ල රෝහල පිහිටි මධ්‍ය භූමිය ඉදිරියේදී යම් කිසි වාණිජමය කටයුත්තකට හෝ වෙනත් කටයුත්තකට අවස්ථාව අනුව ලබා ගැනීම සඳහා අවශ්‍ය පියවර ගන්නා බව අමාත්‍යවරයා සඳහන් කළේය.