හිටපු අමාත්‍ය රිෂාඩ් බදුයුදීන්ගේ නිවසේ මෙහෙකාර සේවයේ යෙදී සිටියදී පිළිස්සී මිය ගිය 16 හැවිරිදි දැරියගේ දේහය දෙවන පශ්චාත් මරණ පරීක්ෂණය සඳහා අද (30)දින ගොඩ ගැනීමට නියමිතව තිබේ.
ඒ පෙරේදා ඒ සඳහා නම් කෙරුණු විශේෂඥ අධිකරණ වෛද්‍ය මඩුල්ල ඉදිරියේයි.
එම මණ්ඩලය කොළඹ විශ්වවිද්‍යාලයේ වෛද්‍ය පිඨයේ අධිකරණ වෛද්‍ය විද්‍යාව පිළිබඳ මහාචාර්ය ජීන් පෙරේරා , කොළඹ විශ්ව විද්‍යාලයේ අධිකරණ වෛද්‍ය විද්‍යා අධ්‍යයන අංශ ප්‍රධානී ජ්‍යෙෂ්ඨ කථිකාචාර්ය වෛද්‍ය සමීර ගුණවර්ධන හා පේරදෙණිය ශික්ෂණ රෝහලේ විශේෂඥ අධිකරණ වෛද්‍ය ප්‍රභාත් සේනසිංහ යන මහත්ම , මහත්මීන්ගෙන් සමන්විත ය.
දැරියගේ දේහය ඩයගම සුසාන භූමියේ මිහිදන් කර ඇති අතර ඊට පොලිස් ආරක්ෂාව ද යොදවා තිබේ.
මේ අතර නුවරඑළිය මහේස්ත්‍රාත්වරිය ඊයේ නියෝග කළේ, දැරියගේ දේහය ගොඩගෙන පේරාදේණිය රෝහලට ගෙන ගොස් දෙවැනි පශ්චාත් මරණ පරීක්ෂණය පවත්වන ලෙසයි.