රාජකාරිය පැහැර හැරීමේ චෝදනාවට වැලිගම මූලස්ථාන පොලීසියේ කොස්තාපල්වරුන් දෙදෙනකු අද (21)දින අත්අඩංගුවට ගත් බව පොලිස් ආරංචි මාර්ග පවසයි.
ඒ ඉකුත් දිනකදී වැලිගම නගරයේ දී පහරදීමකින් පසු බසයකට යට වී පුද්ගලයකු මිය යාමේ සිද්ධිය සම්බන්ධයෙන් තම රාජකාරිය පැහැර හැරියාය යන චෝදනාව හේතුවෙනි.
මෙලෙස මිය ගිය පුද්ගලයා ඇතුළු පවුලේ සැම නිරෝධාන වෙමින් සිට ඇති බවත් මියගිය පුද්ගලයා ආහාර රැගෙන ඒම සඳහා එදින රාත්‍රියේ වැලිගම නගරයට පැමිණ තිබෙන බවත් අනාවරණය වී තිබේ.
පහරදීම සිදු වු අවස්ථාවේදී මෙම කොස්තාපල්වරුන් දෙදෙනා එම ස්ථානයෙන් ගමන් කර ඇති බවද ඉන් අනතුරුව අදාළ පුද්ගලයා බිම වැටී සිටිය දී බසයට යට වී ඇතැයි ද පැවසේ.
කෙසේ වෙතත් මෙම සිද්ධියේ සම්පූර්ණ CCTV දර්ශන පොලිසිය රැගෙන ගොස් එහි මුල් කොටස මකා දමා ඇති බවට මිය ගිය පුද්ගලයාගේ ඥාතීන් චෝදනා කරන අතර ඒ පිළිබඳවද විශේෂ පොලිස් කණ්ඩායමක් පරීක්ෂණ මෙහෙය වන බවයි වාර්තා වන්නේ.