ඉකුත් මහ මැතිවරණයෙන් අන්ත පරාජයකට පත්වූ එක්සත් ජාතික පක්ෂයට හිමිවූ ජාතික ලැයිස්තු මන්ත්‍රී ධුරයට පත්කිරීමට මේ දක්වා යෝජනා වී තිබෙන්නේ පක්ෂයේ වත්මන් නායක රනිල් වික්‍රමසිංහ මහතා බවත්, යම් හෙයකින් එය වෙනස් වුවහොත් පක්ෂයේ වත්මන් නායක රුවන් විජයවර්ධන මහතා ජාතික ලැයිස්තු මන්ත්‍රී ධුරයට ඉදිරිපත් කරනු ඇතැයි තමා විශ්වාස කරන බවත් බස්නාහිර පු පළාත් සභා හිටපු මන්ත්‍රී දිවුලපිටිය එජාප ප්‍රධාන සංවිධායක ආචාර්ය කිත්සිරි මංචනායක මහතා කීවේය.
පිටකෝට්ටේ සිරිකොත මන්දිරයේ පැවැති (ජනවාරි 01) මාධ්‍ය හමුවේදී පැමිණ සිටි මාධ්‍යවේදියකුගේ ප්‍රශ්නයකට ඉහත සඳහන් පිළිතුරු දෙමින් දිවුලපිටිය එ.ජා.ප. ප්‍රධාන සංවිධායකවරයා මෙසේ ද කීය. මෙරට සංචාරක ව්‍යාපාරය නංවාලීම සඳහා ඉකුත් දිනෙක යුක්‍රේනයේ සිට සංචාරකයන් 300 දෙනකු පැමිණීම ඉතා සතුටට කරුණක් වුවත්, ඔවුන් මෙරටට පැමිණීමට පෙර එරට පී.සී.ආර්. පරීක්ෂණවලට සහභාගි වුණාදැයි කිසිවක් නොදන්නා මුත් ගුවන්තොටුපළේ නිලධාරින් විසින් සිදු කළ පරීක්ෂණවලින් මේ වන විට යුක්‍රේන ජාතිකයන් 06 දෙනකුට කොරෝනා ආසාදනය වී ඇති බව පෙනී යන බවත් කීය.
අපේ රටේ ව්‍යාපාරිකයන් කිහිපදෙනකු එකතුවී යුක්‍රේනයෙන් එකතුකරගත් පිරිසක් මෙලෙස සංචාරකයන් ලෙස ගෙන්වා තිබෙන බවට ආරංචි මාර්ග සඳහන් කරන බවත්, මෙවැනි ආටෝප වැඩවලින් රටේ ජනතාව නොරවටන ලෙස සංචාරක ඇමැති ප්‍රසන්න රණතුංග මහතාගෙන් සහ සංචාරක අමාත්‍යාංශ කාර්ය මණ්ඩලයෙන් ඉල්ලා සිටින බවත් ආචාර්ය කිත්සිරි මංචනායක මහතා සඳහන් කළේය.
2020 මාර්තු පටන් මෙරටට ගලා එන ලද කොරෝනා මෙම වසරේදී අඩුවීමට නියමිත බව වෛද්‍ය සංගමයේ සංස්කාරක වෛද්‍ය හරිත අලුත්ගේ මහතා සඳහන් කර ඇතත්, 2021 ජනවාරි ආරම්භයත් සමඟ දිනපතා කොරෝනා 19 වැලඳුණු රෝගීන් සිය ගණනින් රට තුළින් වාර්තා වන්නේ යැයි ද එවැනි ක්‍රියාවන් සඳහා පුංචි පුංචි පැලැස්තර නොදමා යථාර්ථය තේරුම් ගෙන ක්‍රියා කළයුතු බව ද දිවුලපිටිය එ. ජා. ප. ප්‍රධාන සංවිධායකවරයා පෙන්වා දුන්නේය.
කොරෝනා මෙරටට ඇතුල්වූදා සිටම කොළඹ නගරය ප්‍රධාන බස්නාහිර පළාත ඇතුළු සෑම දිස්ත්‍රික්කයකම ස්වයං රැකියාවලින් සිය දරු පවුල් ජීවත් කළ ලක්ෂ සංඛ්‍යාත ජනකායක් ඉතා අසරණ මට්ටමට වැටී ඇති බව ද ඔවුන්ට ඒ ඒ ප්‍රදේශවල ග්‍රාමසේවා නිලධාරින්, ප්‍රාදේශීය ලේකම්වරුන්, දිස්ත්‍රික් ප්‍රධාන ලේකම්වරුන් මගින් ලබාදුන් රුපියල් 5000/= මුදල් ආධාරය සමඟ සහනාධාර බඩු ප්‍රමාණය ප්‍රමාණවත් නොවන බව ද සංවිධායකවරයා සඳහන් කළේය.
වත්මන් රජයට 2021 වසර සඳහා කිසිම සැලසුමක් රට හමුවේ තබා නැතැයි ද පළාත් සභා මැතිවරණය මේ වසරේ පැවැත්වීමට කෑ මොර ගෑ වත්මන් රජය මේ වන විට පළාත් සභා මැතිවරණය කල්දමා තිබෙන බව ද කිත්සිරි මංචනායක මහතා කියා සිටියේය.