මේ වන විට වෙළෙඳපොළේ පවතින උග්‍ර කහ හිඟය හේතුවෙන් හා පිරිසුදු කහකුඩු කිලෝ එකක් රුපියල් පන්දහසක් පමණ දක්වා ඉහළ ගොස් ඇති බැවින් වර්ණ ගැන්වූ කෘතිම කහ වෙළෙඳපොළේ බහුල වශයෙන් අලෙවි වෙන බව සෞඛ්‍ය අංශ පෙන්වා දෙයි.
මෙසේ වර්ණ ගැන්වූ කහ පරිභෝජනය නිසා පිළිකා, වකුගඩු වැනි ආබාධවලට ලක්විය හැකි බව සෞඛ්‍ය අංශ පෙන්වා දෙයි.
සම්පූර්ණයෙන්ම පිරිසුදු කහ ග්රෑම් 100ක් ලබා ගැනීමට රුපියල් 500.00ක පමණ මුදලක් වැය වීම නිසා බොහෝ දෙනා අඩු මිලට ඇති කහ මිලදී ගැනීමට පෙලඹී ඇත. මේ පිළිබඳව අදහස් දැක් වූ කුළුබඩු වෙළඳාමේ යෙදෙන වෙළෙඳුන් කිහිප දෙනෙකු පවසා සිටි‍යේ නියම කහ කෑලි ගෙනවිත් කොටා කලවම් නොකර විකිණීමේදී අවම වශයෙන් ග්රෑම් 100ක් රුපියල් 450.00-500.00ක් අතර මිලකට විකිණිය යුතු බවයි. නමුත් අඩු මිලට ලබා දිය හැකි කෘතිම කහ ඕනෑ තරම් ඇති බවත් ඒවා නම් ග්රෑම් 100ක් රුපියල් 200.00කට පමණ දිය හැකි බවද ඔවුහු පවසති. පාරිභෝජනයට අමතරව කහ කුඩු විවිධ ශරීර ආලේපන, බිස්කට් ඇතුළු බොහෝ නිෂ්පාදනයන්ට යොදා ගන්නා බැවින් ඒ සඳහා කෘතිම කහ යොදා ගැනීම මගින් ඒවා ආලේපනය හා පරිභෝජනය මගින් විවිධ අසාත්මිකතා ඇතිවීමේ හැකියාවක් ඇති බවද සෞඛ්‍ය අංශ පවසති.
මේ වන විට අනවසරයෙන් ගෙන්වන ලද විශාල කහ තොග රේගුව භාරයේ තබා ඇති බැවින් ඒවා විනාශ වීමට පෙර රට පුරා බෙදා හැරීමටත්, මෙරට කහ අස්වැන්න නියමිත පරිදි ලැබෙන තෙක් කහ ආනයනයට රජය අවස්ථාව ලබාදිය යුතු බව වෙළෙඳ ප්‍රජාව පෙන්වා දෙති